抵食夾大件豉油雞脾 發發快餐
Photos by Calvin Kwok
開業已經32年嘅發發快餐，絕對係見證住屯門發展嘅老地方之一。裝修同食物咁多年嚟，都一樣簡單平實。豉油雞脾大大隻而且夠入味，炸魚薯條熱辣辣之餘魚柳嫩滑，薯條仲係細個食開嘅波浪紋。想再飽啲不如食碟吉列豬扒飯配咖哩汁，吉列豬扒分開上仲成隻碟咁大，咬落有肉汁一啲都唔乾。嘢食盡顯師傅功架十足，價錢亦相宜。有睇開飯餐廳專訪就會知道關老闆有時都會喺舖頭同班街坊吹下水，呢種人情味更係加分點。
心機人手刀削麵 一品刀削麵
Photos by jennylau0809 & TM小吃貨
喺而家唔少嘢食都改用機製嘅時候，呢間小店嘅師傅仲堅持自己每日人手削麵，而且仲係即點即削。嗌返碗招牌豬軟骨刀削麵，夾起啲麵的確睇得出有啲唔同，長短有少少分別，但厚度大致相同，中間鼓起而兩邊比較薄，掛湯得嚟又有煙韌口感。豬軟骨亦軟腍易咬。最近天氣比較熱想食涼麵嘅話就可以試手撕雞冷刀削麪，凍嘅刀削麵更有咬口，配埋手撕雞、青瓜絲同酸辣醬，開胃一流。
隱世Cafe手打牛肉漢堡 樂融融
Photos by Veronica*君 & iamcarmen
呢間社企餐廳位置比較隱蔽，格局似飯堂，但勝在樓底高增加空間感。佢地最出名嘅招牌菜係手打牛肉漢堡包配粟米雜菜沙律，漢堡分量唔細，牛肉漢堡扒更有5安士，入口牛肉肥瘦適中，鬆軟又有肉汁。配埋烘過嘅包同芝士番茄等配料，女士一定夠飽。自認比較大食嘅男士亦可以一試佢地嘅粉麵飯，唔少都係3少之選（少油、鹽、糖）或者蔬果之選，夠健康。
印度人主理正宗咖喱 屯門咖喱屋
Photos by 喬子
中西餐食到悶，不如轉個口味嚟食印度咖喱？雖然屯門唔似旺角，唔會有人大大聲嗌印度咖喱，但捧場街坊都知道呢間咖喱屋真正由印度人主理，無論係香濃嘅咖喱牛、鬆化脆口嘅煎餅、定香味十足嘅烤雞件，都保證係正宗風味。嚟呢度食午市套餐最抵食，任揀一款咖喱，就可以配湯、蔬菜、薯條、飯、烤餅同汽水。最後嚟一杯泡沫拉得夠高嘅拉茶，又係滿足嘅一餐。
無法抵擋嘅邪惡手抓餅 5度台式手抓餅專門店
Photos by kenkantravels & jennylau0809
美食唔一定邪惡，但如果明知道係邪惡之物依然抵擋唔到佢嘅誘惑，就肯定係美食嚟！位於屯門龍門居呢條宵夜街之中嘅呢間台式小店，佢地嘅手抓餅就係例子之一。即叫即整嘅手抓餅，無論夾雞蛋、火腿定煙鴨胸，最重要嘅係一定要加芝士，睇住芝士畀熱辣辣又香脆嘅手抓餅皮夾至微融，無得輸！未夠邪惡？仲有炸芝士雞扒，大大塊雞扒入面有爆芝效果，雞扒又唔乾，成件事邪惡到一個點。
街坊宵夜打冷老店 新金榮小廚
Photos by waiyan210 & 霖迪
傳說中屯門街坊未去過都一定聽過嘅潮州打冷舖，第一次不妨試碟雜錦鹵味先，有齊生腸、大腸、鵝腸、豬耳、魷魚等，鹵水味道夠香，而且生腸大腸等無怪味。百花釀大腸係心機小菜，將墨魚膠釀入大腸再炸到金黃香脆，大腸嘅脆同墨魚嘅彈牙估唔到咁夾。蠔仔肉碎粥係正宗潮州粥做法，一粒粒飯有咬口，配肥美蠔仔同帶肥嘅肉碎，入口鮮甜。
住家Feel日本拉麵 赤橋拉麵
Photos by happymealshappyme & Bayvan
唔好誤會，呢度講嘅住家Feel係指環境，舖仔細細但牆上畫咗充滿童趣嘅公仔圖畫，有住家嘅窩心Feel啫。食物就係自己屋企未必咁有心機煮嘅日式拉麵，日本師傅為咗專注喺拉麵質素上，因此只賣魚介豚骨、黑油豚骨同海老豚骨三款湯底嘅拉麵或沾麵，而麵條係托本地嘅製麵廠幫手打，麵質軟硬適中。鐘意食濃味嘅，建議揀黑油豚骨或者海老豚骨；相反想食Light啲嘅，就可以揀加咗柚子皮比較清新嘅魚介豚骨湯底。
細細個就成日去嘅蛇竇 蛇王輝
Photos by Kent-CEO
雖然而家係夏天，介紹食蛇嘅小店好似早得濟，不過依然值得大家Bookmark定等冬天去，點解？蛇羹碗碗足料，蛇肉豬肉木耳冬菇等啖啖好味，熱辣辣暖胃之餘，喺頂嘅檸檬葉帶嚟一絲清香，畫龍點睛。另外臘味糥米飯都一樣足料，糥米飯咬落煙韌軟糯，搭臘味嘅脂香，一樣係冬天必食。難怪唔少街坊細細個就成日嚟呢個蛇王小竇啦。
東南亞風型格素菜 友間齋舖
Photos by BlueMermaid
如果你身邊仲有覺得食齋好old-fashion嘅朋友，可以帶佢嚟呢間連裝修非常有型格嘅素菜館。食物選擇以東南亞為主，所以有串燒、米紙捲揀之餘，亦有上海粗炒等中菜。選擇夠多一班Friend嚟任揀都得。雖然係素食，但連廣東人最愛飲嘅老火湯，唔落肉味道都唔會差太遠。菜式少油少鹽，改用天然香料調味所以唔會無味道，食物水準都有板有眼，值得支持。
悠閒寧靜Cafe嘆Freedom Miss Coffee
Photos by Seobin* & jason小李子
屯門嘅Hidden Gem之一，佢地嘅Special Coffee Drink名副其實真係好特別：Life、Freedom、苦戀、失戀...失戀味道偏苦，而Freedom更得意，店員會就你對自由嘅睇法嚟調製，堅係自由發揮。當然，如果唔想品嘗失戀嘅苦味，都仲有Latte、Flat White、Dirty等選擇嘅。Cafe亦有唔少輕食、Pasta同Pizza選擇。
隨時接收最新資訊
讚好OpenRice專頁！