今年開飯仔特別搵咗自命對追求味覺有強烈使命感嘅「特種開飯團」，進行十面埋伏、吖唔係、係全面巡邏全港九新界，一日食足十餐幫大家地氈式搜索，從唔同地區、唔同菜式當中搵出真正本土滋味！
唔好講笑，荃葵青區唔聲唔聲，其實係「餓」虎藏龍嚟，靜靜地開咗好多間唔同特色嘅餐廳、小店，有地道、麻甩嘅掃街舖或者茶記，但都有高級浪漫適合慶祝嘅西餐廳，就等最愛Fine Dining嘅廚藝工兵Engineer微服出巡落到呢幾區，同大家報告有咩好西食，睇完報告記得投票話返畀兵仔聽你哋最鍾意邊間呀。
抹茶控大愛 荳子
相信大家對呢間餐廳都唔太陌生，荃灣地鐵附近成日都有條人龍喺門口嗰間。冇計，佢啲甜品係幾吸引嘅，好多款都係抹茶口味。又抹茶梳乎厘、抹茶蘋果金寶、抹茶流心多士……個流心多士堅流心，一切開啲抹茶醬就流晒出嚟，面頭仲要有抹茶雪糕同抹茶crumbs，一食三口感。不過佢哋又唔係淨係得抹茶嘅，另外都仲有啲意粉同其他主食。
超濃蕃茄湯 樓下冰室
一場嚟到呢間冰室，基本上冇可能唔叫蕃茄濃湯系同瑞士雞脾/雞翼！因為佢嘅蕃茄湯底係用真‧蕃茄去整㗎，茄味又鮮又濃郁喎，食完個麵係會連啲湯都好想飲埋。配碟嘅牛乳炒蛋夠滑，而瑞士雞脾或者雞翼就滷到入晒味，如果叫多杯紅豆冰咁就perfect池嘞。
曬冷超厚西冷 Home Bar And Restaurant
情調唔錯嘅西餐廳，唔介紹多，淨講德國脆皮鹹豬手同美國10oz西冷扒已經夠晒。前者層皮炸到脆卜卜，豬手肉又鹹鹹香香咁，送啤酒一流。而西冷扒就大大件，厚切，但一啲都唔韌喎，肉質依然保持到鮮嫩同juicy，啱晒食肉獸，包保食得飽！
文青系café 白宮
相機食先通常已經成為每餐飯嘅不明文規定，嚟到呢間café食就更加嘞。上至café嘅裝修、setting，下至每道菜式嘅賣相同擺碟，都完完全全係為咗文青嘅相機而設嘅，如果你一班friends嚟，個個都叫杯熱飲就知，真係杯杯嘅畫杯都唔同㗎，好鬼靚。不過有樣都要有內涵先得，呢度嘅All Day Breakfast同小食拼盤都叫得過呀。
18變蒸肉餅 肉餅哥小炒料理
蒸肉餅呢道餸嚟講，由細食到大。但呢間餐廳居然就以蒸肉餅嚟做主題，有成32款口味嘅蒸肉餅！又豪又補嘅有「足三兩」花膠肉餅，啲花膠原塊上㗎，好有膠感，估唔到同肉餅又幾夾。另外仲有原隻龍蝦肉餅、帆立貝黑松露肉餅等等都好有霸氣，最估唔到係連鹹蛋蒸肉餅都有高級版，變成金沙蛋黃肉餅，咁就啖啖都有蛋黃嘅鹹香味！
工廈半自助餐 和藏
呢間係成張提名名單入面，惟一一間唔喺荃灣區嘅餐廳，嚟自葵涌區嘅和藏，係一間喺工廈入面食半自助餐嘅餐廳。有生蠔任食呢件事已經好開心，佢仲要有埋日式高級安格斯牛肉食，係幾有驚喜。另外仲有其他海鮮包括南非六頭鮑魚、波士頓龍蝦等等，甜品北海道3.6鮮奶蛋白燉燕窩嘅蛋香味仲好重下添。
留意返荃葵青入圍嘅餐廳另外仲有超厚蛋治茶記嘉樂冰廳、放題瀛喜日本料理、多國菜小店Bien Bistro、同格調西餐廳Vision 8。揀啱心水就記得去網站度投你嘅神聖一票喇！
投票網站：https://www.openrice.com/info/awards2017/finalist.html
文：Kar
其他開飯熱店入圍名單巡禮：
甜入心之選 城中人氣甜品店
「意」料之「愛」 特色意大利餐廳指南
隨時接收最新資訊
讚好OpenRice專頁！