想訓練小朋友做Masterchef？咁就要開始試試入廚培養興趣先！9月1日OpenRice聯同香港新東方廚藝培訓，搞咗一個Junior Chef大召集活動，邀請咗10位會員帶同小朋友一齊參加親子烹飪班，學習炮製煙三文魚蘑菇蛋批。
教室位於北角，面積達2,600呎，共有3個教室，足以容納50人，有充足空間俾各位發揮廚藝，亦有專業煮食設備及用具。導師Joe Wong曾跟隨名廚 Donovan Frederick Cooke 工作，烹飪技巧純熟，而且識得將繁複嘅烹飪技藝由淺入深教授小朋友，等小朋友有滿足感。
活動唔係只係煮吓嘢食咁簡單，除咗希望促進親子關係，家長同小朋友多啲互動溝通，由零開始齊心合力炮製出一道美食出嚟！另外亦可令小朋友對煮食有初步認識，同埋透過煮食過程，令小朋友得知食物製作不易，學識珍惜食物同埋欣賞食物。
當日小朋友都好雀躍，小朋友見到食材、煮食用具都好好奇。有爸爸媽媽從旁協助，而且Joe細心耐性講解，同小朋友好多互動，小朋友自由發揮廚藝及創意。煮食過程之中，Joe亦好專業咁教大家煮食貼士，家長之間亦入廚經驗，相信小朋友覺得好玩之餘，爸爸媽媽都有得益！
煮食過程氣氛輕鬆，最後每一位都成功煮出煙三文魚蘑菇蛋批，當然要手機食先啦！即場試食後，小朋友都好滿意，全部食得乾乾淨淨！
香港新東方廚藝培訓有四種專業課程，包括蛋糕麵包、國際料理、特色甜品及咖啡沖泡，亦不時有季節性嘅月餅、牛扒、中國麵食等主題課程。由多位星級廚師教授，亦可以租借場地及舉行活動，有意學廚可以嚟試試手藝！
地址：北角英皇道93號錦平中心2樓
文：Perrins