香港人一向都好鍾意掃街，不過最近可能要忍一忍口喇，買完拎返屋企先食… 將軍澳有商場翻新後，進駐咗幾間掃街小食店，有啲仲會開到凌晨1點添，附近街坊以後一日幾餐連宵夜又多咗選擇喇。

足料手卷  日和屋

 火炙和牛手卷$28、加拿大海膽手卷 $52

呢間主打日式美食嘅小店，手卷有成36款咁多，價錢親民，重點係超足料呀！好似加拿大海膽手卷咁，唔係淨係得面頭嗰一啖食完就冇嘅海膽，而係全條由頭到尾，啖啖都有呀！火炙和牛手卷嘅和牛亦都有返咁上下份量，都好香口。

 三色丼 $68

除咗手卷，呢度都有幾款小食同丼飯選擇，最受歡迎嘅係三色丼，用料新鮮，啲刺身仲要係厚切啊。

地點：TKO Spot地下5A號舖

經典小食  師父仔

 火鴨絲碗仔翅  $25

呢間舖頭仔有多款經典街頭小食，好似腸粉、煎釀三寶等，手工粉果更係每日限量同新鮮製作呢，連火鴨絲碗仔翅都有供應，一大碗好多材料，火鴨絲份量十足，滑身香口。

 芝士蘑菇雞翼 $8/隻

芝士蘑菇雞翼都幾花心機，每隻雞翼入面都釀入咗芝士蘑菇，燒到外皮香脆，可惜芝士味就略為淡咗少少啦。

地點：TKO Spot地下5B號舖

創意甜品   糖將軍

掃街店點少得港人最愛嘅甜品？有選擇困難症嘅朋友嚟到肯定頭都大晒，menu上嘅選擇多到都唔知點揀好，傳統中式糖水又有，近年大熱嘅芋圓系列又有，仲有各式珍奶、奶蓋、茶飲、小食等。就等開飯仔幫幫手，介紹其中三樣較有特色嘅過你哋啦。

 奶凍芋圓 $45

一份奶凍芋圓都好豐富，除咗有奶凍同芋圓之外，仲有紅豆同雲呢嗱雪糕。奶凍又香又滑，芋圓更係自家製作呢，煙煙韌韌幾有咬口。

 芋圓雞蛋仔 $30

芋圓仲可以放入雞蛋仔度呢~ 差唔多粒粒雞蛋仔入面都有芋圓，雖然味道較淡，但勝在Q彈，外層邊邊又仲脆脆地，口感豐富。

 雙重芝士鬆餅 $28

雙重芝士鬆餅則係一道不可「以貌取食」嘅小食，普普通通一個大鬆餅，即叫即製，控制得啱啱好，微熱又軟熟，啲芝士仲拉得到絲添！內餡則可以喺煙鴨胸、煙肉、蟹柳等中間任揀2樣，整體配合起嚟帶微微鹹香，會忍唔住不斷食多啖再食多啖，食晒一個就飽嚕。

地點：TKO Spot 地下5C號舖

文：Kar
相、片：Tom Li