呢排又興返台灣珍珠奶茶，仲要係唔同顏色唔同口味嘅珍珠。太子、元朗等區都紛紛開咗呢類嘅茶飲店。今次要介紹嘅呢間喺銅鑼灣，係真‧台灣過江龍嚟，啲珍珠每日新鮮製作，仲有開放廚房，行街街行過都可以睇到佢嘅製作過程。

珍珠暫時有5款：焦糖、白玉、竹炭仙人掌同黑芝麻，遲下會有新口味喎。啲材料都係由台灣運過嚟嘅，例如仙人掌珍珠就將仙人果汁倒入麵粉度，用機器攪拌之後再用人手搓，然後用另一台機器將粉糰變成粒狀，睇住一粒粒珍珠咁飛出嚟，都幾治癒。

茶飲就有超過廿款，原茶、LATTE、奶茶等都有，每杯500mL。有啲已經有官配珍珠，有啲就可以自選，加一種、兩種，甚至三種都得。

宇治抹茶白玉就官配嚟嘅，開飯仔再加埋仙人掌珍珠，色彩上望落豐富啲。用嘅係靜岡抹茶粉，飲落抹茶味都幾香濃，微甘，但又唔會完全蓋過牛奶味。珍珠幾煙韌，口感唔錯，不過味道唔算太突出，想嗒真啲味可能要先飲咗啖茶，再單咬粒珍珠，咁就會感覺到微微嘅仙人掌酸甜味。

黑洞拿鐵就梗係黑色啦，但加埋鮮奶嘅漸層效果，黑白配咁幾型仔。呢杯係以青茶做底，再用焙茶粉同食用竹炭粉製嘅，茶味幾濃郁。今次加咗兩隻珍珠，竹炭同黑芝麻，襯返色嘛。黑芝麻味相當濃郁，同埋都幾夠甜，建議叫呢隻珍珠嘅話，杯茶飲就可以揀微糖。

而甜魔唔使諗喇，焦糖琥珀拿鐵，連珍珠都揀埋焦糖味啦，夠晒甜。佢哋唔淨止啲珍珠係自家製，連焦糖都係！飲落香甜順滑，不過茶味比起上面兩隻就相對淡些少。

另外，有隻莓果醋飲都幾特別，先係會飲到酸酸甜甜嘅莓味，但當你大啖一吞，就會立馬感受到一陣強勁嘅醋酸味，仲有餘韻添。

收銀隔籬有枱彈珠機，買夠兩杯就可以玩一次，彈中邊格都有獎，爭在係大獎定細獎啦，由免費加珍珠到買一送一都有（下次幫襯用），睇你彩數。

丸作食茶
地址：銅鑼灣禮頓道138號希雲大廈地舖

文、相：Kar