來自大阪嘅神虎拉麵曾經喺4年前旋風襲港，但當時經營者轉變嘅關係而結業。今年佢哋改名後捲土重來，喺灣仔開店。店子以濃而不鹹嘅豚骨湯做主打，並推出5款拉麵，睇下各款拉麵有乜特色先！

店子供應5款拉麵：元虎、神虎、黑虎、赤虎以及海老虎。最基本嘅款式就係元虎($86)，即係有肩肉、手打丸子、木耳嘅原味豚肉拉麵，其餘4款就係以元虎做base。而開飯仔推介就偏愛（下圖）神虎($98)，因為比元虎更多一隻閃令令嘅溏心蛋。

拉麵所用嘅豚肉湯用豬骨熬上至少8個鐘頭，而師傅亦加入背脂（即日本豬油）以及特製神虎汁，豚肉味濃，但不會死鹹，好香，而且湯底好有肉膠原，飲一啖個咀已經好油潤。

拉麵（左）跟足日本配方而製，麵條滑溜兼有光澤，而且都幾掛湯，嚼落唔係齋腍，會有少少彈性。而肩肉（右）比一般拉麵店嘅更厚身、更大塊，採用西班牙黑毛豬，經慢煮低溫處理後浸喺特製醬汁之中足足兩日，但醬汁又不致於搶過豚肉自身味道，恰到好處。

拉麵跟送師傅製作嘅手打丸子（左），以免治豬肉、蓮藕、自家醬汁及薑而打成，豚肉味濃，食落卻不太油膩，蓮藕令口感清爽啲添！而浸漬最少一日嘅原隻溏心蛋（右）賣相好eye-catching，蛋汁亦見濃郁。

好深色嘅黑虎($93)則喺拉麵湯底中加入來自日本嘅黑蒜油，蒜味一般。

以蝦味噌醬去調嘅海老虎拉麵($98)，湯色偏深，味道更多一分蝦鮮味。配料同樣跟拉麵、肩肉、木耳及手打丸子之外，仲有分量多多嘅櫻花蝦，添加少許微脆口感。

一般拉麵店只有普通嘅拉麵配料畀客人追加，但呢度特設精選配料，柯打任何一款拉麵加$32就可以追加一set 4款嘅精選配料，有溏心蛋、腩肉叉燒、筍及兩片紫菜，令拉麵即時upgrade不少！

叉燒腩肉非常厚身，同豚肩肉一樣都係用西班牙黑毛豬及慢煮低溫處理，入晒味嘅瘦肉外面有一層厚厚嘅油脂肥腩，正呀！

除咗各款拉麵，仲有呢款神虎餃子($42)，每朝由師傅自己包餃，用免治豬肉、椰菜做餡。收到柯打後就將包好嘅餃子放入特別訂製嘅煎爐煎香，煎約5分鐘後上碟。

餃子外層煎得香脆，入面嘅豬肉餡依然好香好juicy。如果沾少許以豉油、醋、胡椒粉調成嘅醬汁更加惹味。

店子中間有個開放式拉麵廚房，並設置不少一人座位，好有日本style。

神虎麺商店
地址：灣仔大王東街6-16號安東大廈地舖

文：Joy