踏入秋冬，連甜品店都要換季呀。呢間日式甜品店推出一系列秋冬限定，以日本蜜芋為主題嘅甜品，包括軟雪糕、卷蛋同Tea Set。各有唔同配搭同口感，不過一樣咁Sweet！
 

日本蜜芋雪糕（$68）（全線分店有售）

i CREMERiA即日起推出日本蜜芋系列，選用日本宮崎蜜芋製造，不經加工直接製成芋蓉加到雪糕當中，雪糕亦無加人工色素。淡黃色嘅軟雪糕口感柔滑，有淡淡蜜芋甜香。雪糕仲會配大學芋，係日本一種傳統小食，用炸好嘅蜜芋加蜜糖同黑芝麻，香甜軟綿。再加脆脆同蜜芋醬，增加口感層次。
 

日本烤焦糖蜜芋（$48）（銅鑼灣Sogo店 27/11起獨家發售）

暖笠笠嘅烤蜜芋最啱轉涼食，新鮮宮崎蜜芋會先存放喺溫室，喺指定溫度同濕度下儲藏一個月，令芋肉熟成變得更香滑！再用特製烤芋機烤焗一小時，令甘香芋蜜滲出。最後加上即叫即燒嘅焦糖脆面，增加甜香之餘更突出蜜芋軟綿口感。
 

日本蜜芋午後輕食（$128）（旺角朗豪坊店獨家發售）

豐富嘅Set自然係下午茶首選啦，今次呢個Set就包括日本蜜芋雪糕、日本蜜芋卷、香脆大學芋、紅豆、白玉丸子同自選飲品。日本蜜芋卷以濕潤鬆軟嘅原味捲蛋包住蜜芋蓉，食落甜味突出而唔會太膩。
 

 

日本蜜芋卷（$58）（旺角朗豪坊、銅鑼灣Fashion Walk店有售）

相反如果想食得Light啲，蜜芋卷亦有單買嘅。建議大家可以去銅鑼灣Fashion Walk店，皆因佢地仲會有迷你Tea Set，包一件日本蜜芋卷、香脆大學芋同自選飲品，價錢一樣係$58！
 

i CREMERiA
銅鑼灣Sogo店：銅鑼灣軒尼詩道555號崇光百貨B2樓15號舖
銅鑼灣Fashion Walk店：銅鑼灣Fashion Walk記利佐治街11-19號1樓F-9號舖
旺角朗豪坊店：旺角亞皆老街8號朗豪坊4樓13號舖
尖沙咀海港城店：尖沙咀廣東道3-27號海港城海運大廈地下OT-G03A號舖

文、相、片：Cathy