平時gathering飯局諗食咩都已經好頭痕，遇著生日飯局就更加頭痕！通常你問主角想食問，佢都會答你冇所謂。但冇所謂之中，生日飯總不能夠求其，環境氣氛、食物質素、生日驚喜等，通通都係考慮因素。就等開飯仔畀啲建議你哋參考下。對於一啲無酒不歡嘅朋友，呢幾間bar & restaurant可以諗諗佢。
龍蝦乾邑海鮮濃湯 M1 Bar & Restaurant
圖：環境：★★★★☆
灣仔呢間餐廳，裝修以木做主題，係幾有feel嘅，好彩嘅話仲會有live band添。
食物：★★★★☆
Pina Colada呀、Sangria等等都係果味較香甜嘅酒，好啱一班姊妹嚟邊傾邊飲。嘢食方面水準唔錯，其中有個龍蝦乾邑海鮮濃湯幾乎係必叫，成個農夫包盛住啲湯，然後仲有個龍蝦頭插住喺度，淨係賣相都已經好吸引。啲湯更加係內有乾坤，有一粒粒龍蝦肉食到，啲湯仲混和咗干邑白蘭地，有酒香但冇酒嘅澀，又有龍蝦嘅鮮味，幾有層次。
另外，餐廳雖然冇生日蛋糕，但每日都會有唔同款嘅cupcake，另外，自備蛋糕亦OK，免切餅費呀。
煙霧玫瑰雪糕 AVA Restaurant Slash Bar
圖：環境：★★★★★
講到靚景，呢度一定冇得輸，位於尖沙咀酒店嘅高層，落地玻璃，極寬廣維港海景！想要靚位就記得早啲訂位喇。
食物：★★★☆☆
作為bar and restaurant，酒款當然唔少得，想要易入口啲嘅可以揀菠蘿他他，即係香檳刨冰配菠蘿mousse。
啲嘢食係幾精緻，好似前菜嘅蟹肉雙重奏咁，就用冰水晶球裝住，吸睛度十足。雙重，係指蟹肉同蟹膏，再夾雜住木瓜、蕃茄、芒果等生果，幾開胃。壓軸出場嘅生日「蛋糕」亦係另一吸睛傑作，玫瑰雪糕嚟嘅，但師傅煞有介事咁成間餐車推出嚟，再即場表演加入氫氣咁，造出嚟嘅煙霧效果係幾靚，女生實冧豬。但唔好掛住影相影太耐呀，雪糕會融㗎。
炸燕麥雞翼 Roofy Bar & Café
圖： <IVY>、餐廳Facebook
環境：★★★☆☆
呢間舖位於山林道，磚牆嚟嘅，影感覺照幾啱。但重點係，佢可以帶埋寵物一齊幫襯呀，貓奴狗奴要慶祝生日，可以揀呢度呀。
食物：★★★★☆
識飲一定係飲生啤，夠晒爽。上個月仲啱啱返咗款新嘅生啤，飲落有青檸嘅微酸，同時又有麥芽嘅甘甜。
佐酒小食有好多款，通常都會叫下雞翼、薯條呀咁。呢度有款雞翼幾特別，係燕麥雞翼。即係將啲燕麥圍住隻雞翼拎去炸，係幾脆嘅，但咁樣，到底係健康咗定邪惡咗？
吞拿魚牛油果醬脆筒 Franape Bar & Restaurant
圖：環境：★★★☆☆
太子呢間bar & restaurant，有bar枱都有方枱，裝修格局都幾有氣氛。
食物：★★★☆☆
有唔少近期興起嘅手工啤酒，本地、外國嘅都有。如果女生想搵甜身啲嘅酒，門神嘅灶君唔錯，蜜糖啤嚟。
吞拿魚牛油果醬脆筒係好多人客都會點嘅一款，細細條，一兩啖就食得完，但係吞拿魚同牛油果融埋一齊嘅感覺，就令人好懷念。而生日點可以冇生日蛋糕？呢度仲會幫你預備埋一支長蠟燭，勁爆火花咁閃閃閃。
德國鹹豬手 Toscana Restaurant & Bar
圖：環境：★★★☆☆
估你唔到，葵涌工業區附近都有酒吧餐廳，價錢相對平啲，裝修亦有啲懷舊感，新界西人唔想下下過老蘭可以考慮下。
食物：★★★★☆
嚟到必食嘅係招牌德國鹹豬手，煮法有些少特別，唔係烤焗，而係用東坡肉式嘅煮法，所以層皮唔會好dry，反而係幾溶化，豬手肉亦能保持鮮嫩，配菜仲要係紫薯蓉添，開心。而食豬手，最好就係配紅酒啦，當然，要一大杯Hoegaarden都得。BTW，講多少少，呢度連奶茶、咖啡都係用Hoegaarden酒杯上，又幾過癮。
文：Kar