即係咁，掃街嚟講，一係旺角，一係葵廣！呢兩個地方唔知點解，可以長期keep住有新店開張，特別係葵廣，冇去一兩個星期之嘛，行一行又會發現有新舖嘅。而啲新舖唔一定喺2樓嗰個美食圈圈度㗎，行上行落，任何一層任何一個corner位都可能有新發現！

芝士抹茶     茶芝味



呢間舖9月尾開始試業嘅，提供嘅飲品都有幾多種類，但係第一次去嘅話不得不試港人最愛嘅邪惡組合：芝士宇治抹茶！係呀，平時你哋最鍾意嘅嗰兩樣嘢食呀，放埋一齊仲要變成飲品會係咩味？成杯嘢好明顯分咗兩層，有建議話唔好插管飲，拆開個蓋傾斜45度咁飲喎，係幾新鮮，抹茶甜甜地，芝士又鹹鹹地咁，但係如果芝士味可以再濃返啲就好。

黑松露章魚燒     真‧章魚無雙



大大粒章魚燒，唔淨止睇落粒丸子大呀，就連咬開中間嗰粒章魚都算大呀。章魚燒有8種口味，就咁睇menu最吸引嘅一定係黑松露同芝士味！黑松露嗰隻面頭都幾多醬幾香口嘅，但芝士嗰隻味唔太濃，有啲失望，而且咁大粒丸，換個講法其實即係粉糰幾厚下，嗯。

泰式甜品    泰糯米



呢間泰式小店，有各式各樣嘅泰式甜品，例如千層糕、西米糕等等，有款千層糕仲係玫瑰花咁嘅樣，微甜，煙韌。而芒果糯米飯就一盒盒pack好晒，買嗰陣會即場幫你淋埋椰漿，椰味係幾重嘅，不過都係略嫌乾身咗少少。

自家種植果茶    3 tea



呢間茶店嘅茶，全部都係老闆自己喺雲南茶園度種嘅，大部分都係果茶，例如哈蜜瓜茶、木瓜茶等等，啲生果係研製嗰陣已經加入咗落啲茶葉度，令茶葉沖出嚟散發住淡淡嘅果香。茶葉屬於半生茶，開飯仔試咗隻哈蜜瓜茶，甘甘地但就飲唔到哈蜜瓜味，老闆解釋飲到嘅應該係哈蜜瓜嘅青味喎。

大份玉子燒    魷味



呢間開喺1樓角落頭嘅小店，有好多睇落都好邪惡下嘅嘢食，西多士呀、大阪燒呀、炸壽司呀咁，仲有近期好興嘅玉子燒。玉子燒可以喺粟米、蟹子、芝士以外再揀多種配料，$28份。係幾大份嘅，不過可能開飯仔唔好彩啦，玉子燒得熟咗啲，龍蝦沙律餡但係食到薯仔食唔到龍蝦，嗚呀！至於西多士，表面好吸引下，但一打開見到得好少紫薯，sad咗。

文、相：Kar



葵廣仲有乜好食：
行葵廣 食紫薯 6間小食店逐間試
葵涌廣場飲飲食食（二）2樓新開飲品店 文青系健康派果汁大放送（有片）
葵涌廣場飲飲食食（一）2樓新開小食店 撈雞烤菇芋圓好吸引（有片）
平民美食集中地 葵涌廣場逐層掃


 

隨時接收最新資訊
讚好OpenRice專頁！