叉燒經常畀人一種麻甩的感覺，但原來食叉燒都可以型住食！上環最近新開一間新潮叉燒外賣店，叉燒飯唔係好似平時咁用傳統白色飯盒裝，而係改用放大版嘅咖啡杯，味道方面除咗傳統焦蜜口味，仲有惹味嘅辛麻口味同清新嘅柚香口味呀～

叉燒同坊間一樣選用梅頭豬肉，不過製作過程就落足心思令肉質更軟腍，採用中西合壁烹調手法，幫豬肉長時間按摩後用中式醬醃製，跟住放入特別機器慢煮三十分鐘，先高溫鎖住叉燒肉汁，然後低溫慢煮，最後再高溫煮令表面焦香。

WOW辛麻叉燒 ($58)

辛麻叉燒菜飯，好似層層疊咁一層叉燒一層菜飯，叉燒份量夠晒多～辛麻醬汁加入辣椒及川椒粉等配料製成，味道香辣惹味。加埋流心燶邊蛋真係無得輸！

WOW柚香叉燒 ($58)

柚香叉燒飯就比較啱女士們食，柚子醬汁由柚子、蜜糖及青檸汁，酸酸甜甜，食得出柚子粒，味道清新不膩。

滿杯叉燒(焦蜜口味) (中$76/大$102)

想啖啖都係肉，就可以叫返杯滿杯叉燒，全部都係粒粒叉燒肉！焦蜜味道香甜帶焦香，買返屋企加餸又得啫！

WOW叉潛艇 ($42)

叉燒除咗可以配飯其實配麵包都一樣咁夾，加入生菜令味道更fresh！

好叉好味  

地址: 上環禧利街14號地舖

文: Yanica

相、片: Tom Li