銅鑼灣登龍街已經成為香港嘅拉麵街喇，短短一條街竟然有六間拉麵店，最近又有新成員加入！梅光軒雖然已經喺香港一段時間，不過以counter為主，今次終於開設獨立店，仲有開業限定嘅龍蝦拉麵添！
梅光軒於2012年來港，總店位於北海道旭川，有接近50年歷史，多年來一直獲北海道米芝蓮指南推介，於日本有4間分店，海外據點有台灣、新加坡、越南及夏威夷。
舖頭用嘅大部分食材都來自北海道，同總店一樣，包括湯底、中曲麵條，甚至係豬油，確保有當地風味。湯底用豬骨、雞、沙甸魚及昆布等熬足12個鐘，再急凍直送來港。
新店有幾款新拉麵，最吸引當然係開業限定嘅「登龍之極」，用上波士頓龍蝦製作，每隻都足400克，肉厚又有膏。龍蝦湯加入鹽鞠，再混合招牌豬骨湯底及味噌而成，有淡淡龍蝦鮮甜又唔太過搶味。每碗有半隻龍蝦，仲有兩隻北海道帶子，加埋北海道芝士炙燒，好香口！每碗$128係抵食嘅，不過每日限量十碗架咋。
「登龍之極」$128
炙燒五花叉燒拉麵，可以揀醬油、鹽味同味噌口味，叉燒用五花腩製作，比普通叉燒更肥美，上枱前用火槍炙燒，油香十足！另外一款生薑醬油拉麵就只於冬天供應，湯底加入生薑製作，清香唔太辣，食完好暖胃！
炙燒五花叉燒拉麵 $98
生薑醬油拉麵 $85
舖頭只有18個位，冇counter位，午市一開始就好爆場！想食就要早少少排隊喇。
地址：銅鑼灣登龍街44號登輝大廈地下
文、相、片：Perrins