一幻拉麵名氣未必及另一間拉麵店，但講好味程度就絕對唔輸蝕！源自北海道札幌，2009年由店長林直樹先生創立，自創蝦湯拉麵而一炮而紅，成為札幌名物之一，於日本札幌及東京暫時有4間分店，於台灣及印尼均有分店。今次香港店就係灣仔，開業日期為10/4！
唔緊要，照睇住介紹先。餐牌同日本店幾乎一樣，主打蝦湯拉麵可以揀口味、豚骨及麵條等，有成18款配搭，一樣賣$88/碗。開業初期有總店長林直樹駐店監控，店長前田哲郎師傅亦會長期留港，香港師傅亦曾飛過去當地學藝兩個月，確保味道一致。
基本上大部分食材同總店一樣，一幻最馳名嘅甜蝦湯底就係香港店新鮮熬製，每日用50公斤蝦頭熬3小時而成，暫時每日供應300公升湯，大約有400碗左右。湯底可以揀原味，適量豚骨及濃厚豚骨，加咗豚骨湯味道更濃，但原味就最食得出蝦味。
口味亦分三種，分別係味噌、鹽味及醬油，調味醬就係由北海道每兩個星期運來。師傅推介最清嘅鹽味，因為可突出蝦味，而最受歡迎嘅就係帶甜嘅味噌，醬油就多一份鹹香，三款口味其實都各有長處。每一碗嘅湯底，都會獨立用蝦油、薑蒜、豬背脂及調味醬等逐個煮製，新鮮滾熱辣。蝦香撲鼻，飲落唔會好濃好假。
麵條有粗麵及幼麵，雖然唔係日本直送，但就係店長搵香港麵廠度身訂造，更加新鮮。溏心蛋亦選用九州蛋，不過製法跟足原著。湯底面層浮上一層油，師傅解釋因為北海道天氣凍，所以用油封住湯底，確保溫度保持熱辣辣，所以香港食得到同北海道一模一樣嘅風味。
每碗麵上面都加咗紅色麵味麵酥，用麵粉、紅薑及蝦油湯底自家製成，仲有少量蝦頭炒成粉提鮮，一上枱就聞到陣陣蝦香。
比起其他過江龍拉麵，價錢唔算mark up得太離譜，日本780円一碗，香港賣$88，已包半隻溏心蛋。
北海道流行將蝦湯配白飯，香港都一樣有，而台灣同香港仲有獨家叉燒飯，白飯配上厚切叉燒粒，都幾香口。其他小食包括蝦味飯糰、餃子等。
值得一提係香港店裝修由法國名師設計，有仿照札幌總店嘅木塊牆身，彎型橙色頂篷係模仿甜蝦形態，好特別。記得正式開業日期係10/4，bookmark定去食呀。
地址：灣仔皇后大道東119號地下B舖（船街交界）
文、相、片：Perrins
