無論肉類料理、低碳餐單甚至輕盈菜式，其實都有少鹽少糖版煮得出色美味，減少攝取鹽同糖，身體又可以健康啲。今期介紹3間參加咗「少鹽少糖食店計劃」嘅餐廳畀大家，包括型格Cafe、集娛樂設備於一身嘅西式同粵式餐廳，照顧你唔同口味！
香煎澳洲草飼肉眼牛扒配薯蓉
牛扒品質靚，醬汁就無需太多花巧都可以帶出食材原味，所以餐廳用上澳洲草飼肉眼牛扒，肉味較濃厚突出，煎牛扒時加入黑椒增添風味，減少對鹽嘅依賴；而靈魂牛肉汁用上大量牛肉、紅酒、水同洋蔥熬煮，只用極少鹽提味，更無添加糖𠻹。仲有融合牛奶天然甜味嘅薯蓉，以及清爽嘅車厘茄同秋葵平衡口感𠻹。
慢煮雞胸牛油果沙律
低碳飲食畀人「無味」嘅錯覺，但其實用天然果汁都可以調出美味醬料提味。鮮嫩嘅慢煮鷄胸肉、牛油果、沙拉菜同車厘茄加少少黑椒，再淋上用新鮮檸檬汁、新鮮柚子汁、油同蜜糖調配嘅甜酸汁，無需額外加鹽同糖都味道豐富同埋好開胃。
高蛋白質營養餐
健身朋友都啱食嘅餐點！慢煮鷄胸肉定量有200g，肉香滿滿，配以三色螺絲粉、沙拉菜同車厘茄融入天然甜味，只加入黑椒、經稀釋嘅黑醋略為調味，唔落鹽同糖反而更清新。
皇雀會(葵芳店)
鮮茄魚柳
粵菜多數以惹味見稱，但其實少鹽少糖版都一樣滋味好下飯！以新鮮番茄同洋蔥嘅甜味代替部分糖用量，再經長時間烹煮逼出番茄味，配合容易掛汁嘅魚柳，以及芫荽同蔥作點綴，無需添加鹽，色香味都充滿天然風味。
鮮淮山涼瓜煎蛋角
男女都鍾意食嘅煎蛋角本身已經蛋香十足，加入涼瓜片，唔落糖都有一份獨特嘅甘甜味，伴上脆炸淮山絲、芫荽同辣椒增加風味，絕對係白飯小偷。
蝦乾茶樹菇浸蘿蔔
清潤嘅走肉菜式好啱想keep fit嘅朋友，呢道菜以蝦乾天然鹹香味代替鹽，加上茶樹菇嘅菇香同蘿蔔帶出嘅甜味，無需添加鹽同糖，落少許芫荽同辣椒增加風味就足夠。
Joe's Billiards & Bar (油麻地店)
胡椒白酒烚蝦球與海苔菠菜
細味食材原味道～呢道菜用上多種材料，即使無添加糖同鹽都一樣味道豐富，例如焗原個蒜頭引出甜味；以胡椒粉同芝麻帶出蝦球鮮味；而彈牙香菇、爽口菠菜等搭配白酒同微鹹嘅海苔，口感同味道都層次豐富。
網燒無鹽三文魚嫩滑蛋蓋粗纖糙米飯
滑蛋蛋香同富魚油香嘅三文魚係經典嘅美味組合，而糙米飯伴車厘茄、青瓜、蔬菜絲，無需靠添加糖、鹽就凸顯食材鮮甜味，加埋少許海苔絲同白芝麻，令餘韻更加多變化。
芝士烤灰蘑菇清煮菜花伴南瓜
要食得飽又食得清，推介「芝士烤灰蘑菇清煮菜花伴南瓜」！焗迷你南瓜內藏米飯，本身已經自帶甜味，配合灼西蘭花、雞髀菇、本菇以及煎新鮮車厘茄就更加增加層次感；另外大蘑菇面層灑上微鹹嘅芝士碎，烤焗後更滋味。
