疫情雖然有緩和跡象，但係港人外出用餐嘅意慾仍未完全回復。唔少受影響嘅食肆都推出優惠挽救，例如最近好多餐廳都紛紛轉型推出任食放題，連現代風川菜、高質日式和牛燒肉、龍蝦專門店及高級中菜廳通通都有份！
新派川菜館 川流 
日式放題就食得多，川菜放題你又食過未？灣仔呢間走現代風嘅新派川菜最近推出$298晚市任點任食，每人可以享用兩款前菜醋椒胡辣羹及家鄉燻臘肉胡椒餅、主食二選一包括水煮魚片或豆酥桂魚、麵食二選一包括擔擔麵或文殊院甜水麵外，90分鐘內仲可以任食八款川式小菜！包括蒜泥本地黑毛豚白肉、回鍋本地黑毛豚、宫保雞丁、小籠包、魚香茄子、麻婆豆腐、素煸花生芽及乾煸四季豆。用平時叫兩三個小菜嘅價錢就可以任食真係好抵呀！
高級日式燒肉 和牛蕃
連日本和牛都有得任食！銅鑼灣呢間燒肉店由東京名店「蕃 YORONIKU」創辦人，名廚桑原秀幸主理，主打日山和牛。而家餐廳推出90分鐘日本國產牛($388/位) 或日本A5和牛($488/位)放題，前者肉味濃厚，後者油花較重，不過選擇$488嘅都可以食埋國產牛～另外放題仲包埋西班牙伊比利亞的豬腩肉及雞腿肉，真係啱晒食肉獸。
圖:性價比高台灣菜 南勢角台灣牛肉麵
最近無得飛台灣，可以食住台灣菜止吓癮先。將軍澳呢間台灣菜早前都推出咗$118放題，90分鐘內任飲任食餐牌上所有菜式，選擇有成38款主菜、小食同50款台式飲品，必試有湯底熬足十小時嘅招牌御品牛肉麵、淮山杞子蟲草花雞湯及有六款口味揀嘅一口鹽酥雞等。
圖:龍蝦專門店 Red Lobster
呢間過江龍龍蝦專門店有放題呀～香港店會於6月推出「Endless Shrimp」放題，雖然就唔係任食龍蝦，但$198可以任食6款鮮蝦美食，包括大蝦意粉配龍蝦醬、爆谷蝦、夏威夷椰子蝦、招牌蒜蓉蝦、大蝦手工薄餅及烤大蝦，都咪話唔抵。不過為免浪費，每人每次只可點選任何一款鮮蝦美食。
圖:大館中菜廳 The Chinese Library
點心放題大熱！無論係主打親民嘅酒樓抑或有米芝蓮加持嘅中菜館都齊齊推出點心放題，中環呢間位於大館嘅藝術風中菜館都唔例外，雖然係中菜館，但裝潢走西式典雅風。餐廳推出$298兩小時周末午市點心放題，可以任食十四款點心，包括麻辣魚柳包、黑蒜燒賣及羊肚菌水晶餃、松露山珍腐皮卷等。
文: Yanica
相: Tom Li / OpenRice會員
