飲食業要用大量塑膠、即棄餐具，做成浪費之餘亦好唔環保！近來有唔少餐廳甚至酒店，都宣佈減少及停用一次性塑膠餐飲用品，為環保盡一分力，實在係一大喜訊。根據環保觸覺資料，塑膠乃第三大本港廢物成分，佔全港都市固體廢物的21%，其中即棄塑膠餐具每日棄置量達154公噸，而發泡膠餐具棄置量為39公噸。（資料來源：http://www.no1off.com/）
大量塑膠廢棄物亦同時影響海洋生態及食物鏈，人類有機會進食到有塑膠及毒素成份海產，甚或全球逾九成樽裝水含有塑膠微粒。濫用即棄塑膠物品對生態及人類健康造成損害，所以係時候走塑！
香港海洋公園保育基金正進行「全城走飲管」活動，餐廳可參與「無飲管伙伴」、「無飲管星期五」、「無飲管八號」，於網上即可搜尋到無飲管餐飲地圖（https://nostrawmap.opcf.org.hk/），將來更會力推無膠餐具。
OpenRice亦即將啟動「支持減塑」活動，將會列出一系列可以走餐具、飲管、外賣袋、飯盒以及膠杯嘅餐廳，製成地圖俾各位參考。早前我哋亦免費送出環保飯袋及木筷子，鼓勵大家少用即棄餐具及外賣膠袋。
本港走塑餐廳資訊（不時更新）：
肯德基香港由2018年8月23日起港澳全線分店，堂食唔會主動派發塑膠飲管及杯蓋，外賣除外。不過如果回饋返啲食客，同埋連餐具都可以唔用一次性塑膠製品就最好喇。
半島酒店母公司宣佈旗下酒店及餐廳，包括香港半島酒店、淺水灣影灣園、山頂凌霄閣等，11月1日起，停止供應塑膠飲管，並以可持續物料製造嘅用品代替。
圖：酒店Facebook
設有餐廳及美食站嘅瑞典傢俱店IKEA，宣布將於2020年前，淘汰所有即棄塑膠產品，包括飲管、杯碟及餐具。香港IKEA亦將於2018年年底開始，逐步改用可再生物料餐具取代即棄塑膠用品。
圖：快餐店如大快活可走餐具、飲管，亦歡迎自攜餐具。全線美心MX設有補水站，免費供應食水，可減少買支裝水。其他不主動或停止供應即棄飲管的餐廳包括牛角、Pacific Coffee、Pizza Express等。
圖：美心Facebook
部分餐廳及咖啡店如自攜本地品牌BUCKET飲管，可獲扣減$1至$3優惠，詳情可瀏覽hashtag「#我有飲筒喇唔該」或網頁：https://www.facebook.com/bucketthestraw/
圖：BUCKET Facebook
外地方面，台灣早前發表「限制塑膠吸管」草案，對使用唔少飲管嘅台茶店好大影響。早前有唔少爭議，不鏽鋼飲管未必衛生，用料亦未必符合安全標準。早前台灣有人研發出甘蔗渣飲管，可以重複使用亦可自然分解，環保得多。
圖：100%植 Facebook
美國星巴克承諾將於2020年完全停用一次性飲管，現時以紙吸管或可分解吸管代替，部分凍飲更以特別設計的啜飲膠蓋。雖然膠蓋可作回收，但以膠代膠，係咪真係環保咗？
塑膠製品用完即棄雖然方便，但實在非常浪費又唔環保。環保在乎身體力行，只要大家肯盡一分綿力，改變以往的習慣，小舉動都可以保護到地球，為自己未來以及下一代生活得到改善，少少不便又何妨呢？
文：Perrins