日夜大不同！呢間餐廳白晝係Cafe形式，供應各種西日料理、咖啡等；入夜就好似居酒屋，主打日式串燒，亦因為咁，串燒菜式一度受疫情政策而影響供應。不過現時已經全面回復正常，海鮮類燒物亦加入常駐款式；如果想一次過試到多款特色肉類串燒同海鮮燒物，就非廚師發辦莫屬喇。

白晝推介

燒鰻魚定食（$188）味噌汁付

鰻魚足料入味

午餐雖然有意粉、全日早餐等西式菜餚，但主要供應日式料理，例如燒鰻魚定食。鰻魚大件厚肉，醬汁鹹甜適中，拌上紫菜絲、用日本蛋製作嘅蛋絲一齊食會更提味；而漬物同沙律，開胃又解油膩感。成個餐分量適中，只係作為午餐略貴咗啲。

虹吸咖啡（$70-120）

飯後想嘆杯回魂啡嘅話，呢度有唔少選擇。午餐本身包美式咖啡、鮮奶咖啡、泡沫咖啡或蘋果/橙汁；你亦可以7折價錢選擇其他咖啡，例如虹吸咖啡、啡酒口味。

Coffee bar由資深咖啡烘焙師吳子濠Nigel擔任顧問，佢投身咖啡行業超過20年，具有歐洲精品咖啡協會一級咖啡師同一級烘焙師資格；另外亦有幾位咖啡師輪流駐場。想點虹吸咖啡嘅話，可以向店員查詢是日口味，沖煮後會連埋咖啡渣一齊上，畀你聞一聞其香氣，令成個品啡體驗更完整。

百利甜酒鮮奶咖啡（$68/熱，$78/冷)

另外有幾款咖啡配上唔同嘅酒，好似加入Bailey’s嘅百利甜酒鮮奶咖啡，酒香同咖啡味突出得嚟又好融和；攪勻後配埋自家製曲奇，味道會有更多變化。

咖啡用日本天然水，以及咖啡專用沖煮水AQUACODE嚟沖泡

晚市推介

晚市主打嘅串燒廚師發辦，有前茶、串燒、燒物、和食等，款式會喺主餐牌上抽取，亦有機會用時令食材製作，以下係部分菜式：

6款串燒

廚師發辦（$688/位）

可單點：秘製雞肉棒棒（$58）

串燒係非固定配搭，秘製雞肉棒棒、日本華味鳥手羽先、煙肉蠔卷、日本豆腐燒等款式都有可能出現。而招牌款式之一嘅秘製雞肉棒棒，雞肉經過人手捶打後，彈牙厚實；蘸埋用日本蘭王蛋做嘅月見汁，口感滑溜富蛋香，即使單點都值得一試。

1道燒物

可單點：北海道鱈場蟹腳（$588）

可單點：北海道鱈場蟹腳（$588）

燒物可以揀海鮮或和牛，而海鮮有機會品嚐到北海道鱈場蟹腳或火焰榮螺。其中榮螺以日本煮酒同燒，口感彈牙，留意返上檯時會伴隨火焰，記得準備定電話打卡呀。

2道和食

可單點：爐燒乾物拼盤（單點$128）

可單點：吉列廣島蠔（單點$48/2隻）

和食則有機會出現爐燒乾物拼盤同吉列廣島蠔。前者包括爐燒雞泡魚干、大澳花竹蝦乾同大澳瀨尿蝦乾，一嚟支持本地出品，二嚟大澳海鮮乾天然曬乾後保留到食材嘅鮮甜味，再經爐燒味道更加濃郁，好啱佐酒。後者外層香脆，內裡juicy，如果炸漿薄啲會更好。

主食

可單點：燒明太子／梅子飯糰配茶漬湯（$48）

收尾嘅燒飯糰可以一物二食，先咬一啖燒到微焦嘅飯糰，再將餘下分量放入茶漬湯，飽肚而不油膩。

Mizu  
地址: 佐敦德興街3號地舖

文、相：Cathy.C