早排開咗唔少食吉列牛嘅餐廳，最近中環就有間食吉列豬嘅餐廳新開張，夜晚仲會變身埋做主題酒吧，以有機同天然方式栽培嘅葡萄酒，或者辛味清酒嚟配搭各款豚肉料理。

主打嘅係熟成豚西冷及豬柳定食，豬肉係嚟自鹿兒島嘅三元豚，直送到港後以低溫熟成，然後以慢熱加溫嘅方式烹調。皮用麵包糠去炸，而且係混合咗三種麵包糠咁多。師傅仲話啲麵包糠特登切大粒啲，令到炸出嚟嘅口感更加脆。炸起嘅豬扒肉色偏淺粉紅，軟腍有肉汁，醬汁有幾款選擇，建議先點喜馬拉雅山粉紅岩鹽同芥末，引出原本嘅肉香。另外亦可以點餐廳自家製嘅吉列汁，係由紅味噌、紅酒同蜜糖製嘅，濃味啲送飯幾啱。

另一個食吉列豬嘅方法，就係將佢變成肉餅再炸，然後點蕃茄醬，又幾醒神。

食三文治都可以好豐富，呢份三文治，就成嚿吉列豬柳夾咗喺中間，厚厚der。同樣配自家製吉列汁，香香甜甜。

而當夜晚化身成酒吧嘅時候，當然就會多咗啲佐酒小食。好似燉煮豬雜同香荽豬耳咁（係呀又係芫荽），前者以紅味噌同豬腩肉秘製湯底，長時間燉煮嘅豬雜變得腍身而冇腥味，豬耳亦爽脆。

GRAVNER  IGT VENEZIA GIULIA BIANCO BREG 呢支嚟自意大利北部嘅白酒，同生酛のどぶ清酒係其中兩款推介嘅酒，兩隻都係香港好少地方飲到。其中，隻白酒笨唔係白色，而係琥珀橙色，飲落有些少木香，葡萄味濃。而隻SAKE就係濁酒嚟，奶白色，淡淡米香過後慢慢慘出辛味。呢度嘅酒款都比較罕見，而且耐唔耐就會換下MENU，鍾意飲返兩杯嘅朋友仔，又多個新蒲點。

Porker
地址：中環威靈頓街55號地庫

文、相：Kar