而家好多女生都好注重養生同健康，多菜少肉仲要最好係superfood 。不過如果啲嘢食健康得嚟又夠靚仔可以打埋卡就perfect池喇~~ 何文田最近新開咗間裝修幾cosy嘅fusion菜小店，有碗超靚靚嘅beauty bowl，迅速成為各位女生嘅飛佛。

呢碗beauty bowl（美容碗）一望落去就好鬼sharp醒，七彩繽紛，打卡一流。逐樣材料解構下先，面層舖滿嘅分別係雞蛋、蘿蔔、紫蘿蔔、紅菜頭鷹咀豆泥、紫白菜同藜麥配蜜糖芥末，底層就係滿滿der羽衣甘藍同菠菜等，全部都係健康食材嚟。都幾大碗下，女生食一碗當lunch都夠晒飽。

咁餐廳當然唔係淨得菜啦，仲有唔少肉for肉食獸嘅。好似慢煮牛扒丼咁，有好多塊小扒啊，以慢煮方法處理，肉質軟腍而又保留到大量肉汁，再配埋柚子胡椒，入口先係一陣強烈嘅柚酸，再慢慢滲出胡椒嘅辣，層次豐富。

至於重點推介，就係得晚巿先有嘅慢煮牛小排，仲要每日限量供應得6份咋，想試到真係要趁早。慢煮牛小排要慢煮成36個鐘，肉色粉嫩，相當入味。每片嘅脂肪都分佈平均，肉味香濃，面頭仲有各色甜椒點綴，無論賣相定味道都再加分。

 吞拿魚拌飯配牛油果、溫泉蛋同樣都係色香味全。

餐廳遲下仲會有日本威士忌同其他酒款飲添呀。喺未有酒之前，試住個香蕉奶昔先都唔錯。啲香蕉係老闆每日喺油麻地果欄新先買返嚟㗎，製作成奶昔後，香蕉味依然濃厚，啖啖杰身嘅奶昔中，仲會食到啲香蕉蓉添。

SHAO
地址：何文田梭椏道15-15A號典雅大廈地下4號舖

文、相、片：Kar