好多人收工之後都鍾意同班friends去chill一chill，早前就同大家介紹過一間台灣手工啤過江龍啦，今次就同大家介紹兩間本地薑。兩間各有特色，一間有靚靚摩天輪，一間主打威士忌同手工啤。

位於尖沙咀嘅呢間酒吧，都幾大間，一入到去就見到各式各樣嘅桌上遊戲，不過對女生嚟講，呢度最吸引嘅一定係摩天輪同旋轉木馬！唔係玩嗰啲呀，而係cocktail一式12杯會放喺靚靚嘅摩天輪或者旋轉木馬度出場，識轉㗎，摩天輪仲識著燈，女生們見到一定尖叫同要瘋狂影相！

介紹返，摩天輪上嘅cocktail係用新鮮青提子、棉花糖糖漿同柚子汁調製嘅，果味香甜幾啱女生飲。而旋轉木馬上嘅就係由胡椒釀伏特加、蕃茄湯、伍斯特醬、卡宴胡椒同檸檬汁調製出嚟嘅，口味相對刺激啲，辣辣地咁幾獨特。

至於佐酒小食，炭燒豬頸肉同南乳炸雞翼都係唔錯嘅選擇，特別隻雞翼層皮脆卜卜，食落有陣陣南乳鹹香，係幾好送酒嘅。

Crying Joker（墨西哥辣椒、伏特加、紅莓果漿、檸檬汁及蘇打水）

Carnival
地址：尖沙咀天文臺道8號6樓1號舖

另一間酒吧就喺太子，係香港少數以威士忌做主題嘅西式酒吧，同時引入超過60款本地同世界特色手工啤，款式仲會定期更新，即使成日去嘅朋友都唔會覺得悶。如果有選擇困難症嘅話，可以揀「隨意」，咁就會由駐場經理按你嘅衣著、表情、情緒等，揀一款畀你。而龍頭嘅生啤就全部都係本地釀酒師釀造嘅。

呢期on tap嘅就有小清新嘅GAMBLER'S GOLD、同時帶有茉莉花香同啤酒花回甘嘅Jasmine Pale Ale、麥香味重之餘又滲有焦糖甘甜嘅麥芽魔力，同啤酒花味夠晒突出，回甘度高嘅HK Bastard IIPA。

而全舖最特別嘅莫過於以下呢兩款酒，一款係浸過橡木桶嘅啤酒，而另一款係浸過啤酒桶嘅威士忌！前者係Barley Wine嚟，喺威士忌木桶片陳釀咗180 日，再喺瓶內2 次發酵1 個月後先至出街，而且仲可以放成5年咁耐，酵母同酒體亦會隨年月繼續變化，全球限釀236 支，暫時只此一批咋！開飯仔有幸試過，的確係比一般啤酒醇厚。而後者就喺度身訂造嘅精釀啤酒 IPA 桶中過桶熟成，有威士忌嘅木桶味同麥香味之外，同時亦有清新嘅柑橘香同淡淡嘅啤酒花香。

小食方面亦頗創新，佐酒最佳拍檔嘅薯條，呢度仲有3款醬揀，分別係腐乳、中式甜麻醬同酸梅醬，係特別嘅。呀，仲有原粒麥芽食添呀，邊飲酒邊食，酒味更香。

(相片由餐廳提供)

The Oak Crafted
地址：太子通菜街223 麗明大廈地下F 號鋪

文、相：Kar