坊間有唔少真菌類零食/料理，例如全天然香菇乾、鮮菇餅，甚至係即食松茸飯、雜菇飯料同以牛肝菌製成嘅牛肝菌麵等。佢哋大部分都會喺包裝度標榜全天然呀、營養豐富呀咁，到底係真唔係？

 鮮菇餅

 雜菇飯料

幾位街坊朋友試食過鮮菇餅後，都覺得呢隻零食相對上冇咁多鹽份，食落又比較清淡。並認為雜菇飯料都幾好食，並相信其營養價值較高。重點係，方便嘛，又易整。

  溫巧晴營養師

事實又係點？我哋搵嚟營養師溫巧晴小姐為我哋講解一下。溫小姐先指出真菌類原有嘅營養，「菇菌類其實都係屬於低脂肪，同低熱量嘅食物。」低脂低熱量係好多健身人士同女生渴求嘅呢。唔止咁，豐富嘅膳食纖維有助促進腸臟蠕動，預防便秘，同埋增加飽肚感，減少我哋過量進食嘅機會，從而有助體重控制；豐富蛋白質可以提供到人體唔能夠製造嘅必須胺基酸，維持正常身體機能運作，促進體內細胞恢復同更新；而豐富嘅胛質更有助平衡體內電解質，幫助排走體內多餘嘅鈉質，有去水腫同降血壓嘅功效。

但當菇菌類製成零食後，雖然好似香菇脆餅咁，標榜真空脫水製作，又係非油炸，聽落好似好健康。不過營養師表示喺製作過程入面都有加入到油份，熱量同脂肪含量都好高。「另外生產商為咗令到呢啲零食更加好味，都會加入咗大量嘅調味料，例如係蒜蓉、鹽等等，所以佢哋嘅鈉質含量都好高，食太多都會容易水腫。」

 即食松茸飯

至於即食松茸飯等，營養師表示「裡面含有嘅菇菌得好少，如果想攝取到菇菌嘅營養價值，可以額外煮返啲菇嚟配呢個飯食。」總括嚟講，菇菌類營養價值咁高，建議大家都係食返原型嘅菇菌比較好。而菇菌嘅烹調方法千變萬化，無論係煎、炒、炆、焗定係做涼拌都可以，雞髀菇炒肉碎、雜菌炒牛肉、香菇紅燒豆腐、本菇炒飯或者雜菇豆腐味噌湯等都係營業師建議嘅菜式。「不過如果你要用油去煮菇菌嘅話，建議用返少啲油去煮會好啲，因為蔬菜、菇菌比較容易索油，用太多油就變咗會攝取多咗熱量啦。」

如果真係好想買零食嘅話，咁就盡量揀返啲非油炸，同埋冇額外添加好多調味料嘅會比較好。同埋可以先睇睇包裝袋上面嘅成分表，「因為成分會喺排列時按住分量嘅多至少而定，排得愈前，即係代表成分愈多。所以如果成分表頭3位有油份、糖份同鹽份，大家就要多啲留意。」營養師補充，除咗睇成分表之外，另外亦可以睇下包裝上面嘅營養標籤，「我哋會建議每100克嚟講，脂肪含量唔建議多過10 gram以上，而糖份就唔建議多過25 gram。如果係低過5 gram，就更加理想。」

鳴謝：溫巧晴營養師
 

文：Kar
相、片：Tony、Yan Yan

【OHealth!】 食用真菌篇

5種常見食用真菌介紹及功效 (傳送門按此)
輕鬆食譜跟住整  迷你蘑菇漢堡 （奶素/純素）   (傳送門按此)
5大貼士！野生食用菌店主教路 野生菌唔可以用水洗？ (傳送門按此)
8大推介 真菌餐廳集合 中西日式都有 (傳送門按此)
歪歪實試！尖沙咀松露主題餐廳 邊道菜式最濃味？ (傳送門按此)
歪歪實試！尖沙咀新派中菜 大推松茸羊肚菌海膽燴飯 (傳送門按此)