今次終於唔係日本先有啦！各位My Melody粉絲只要去樂富呢個商場，唔單止可以同Melody瘋狂Selfie，而且仲有消暑一流嘅Melody造型雪條 、喚醒少女心嘅Melody杯子蛋糕同涼快香醇嘅特色卡布其諾咖啡，而且收益仲會撥捐作慈善用途！

平時見到日本有咁多卡通人物期間限定Cafe，粉絲都只可以無限葡萄。但今次樂富廣場同日本Sanrio合作，將A區美食坊搖身一變成Melody士多啤梨農莊。有得影相之餘仲有Snack Bar ，只需捐款港幣20或以上，就可以獲得其中一份限定版小食或甜品。

炎炎夏日，最吸睛嘅當然係Melody造型雪條！橙色嘅菠蘿橙味夠清新，士多啤梨忌廉味嘅粉紅色又襯哂Melody，打卡自拍啱哂。

另外仲有士多啤梨朱古力味同夏日檸檬味嘅My Melody 杯子蛋糕 ，同My Melody 特色卡布其諾咖啡任揀。雖然選擇唔算特別多，不過小食多滋味吖嘛，而且收益仲會撥捐慈善環保團體綠領行動。

留意返Snack Bar星期六日先開放，想一邊食限定版小食一邊做善事，就週末先約朋友一齊嚟啦。

My Melody全城「綠」運會 Be a Green Team Member
日期：由即日起至2016年8月21日 (星期日)
地點：樂富廣場A區美食坊及B區露天平台

My Melody 主題Snack Bar
日期：2016年7月16日至8月21日 (逢星期六及日)
開放時間：中午12時至下午8時
地點：樂富廣場A區美食坊