團年飯唔少家庭都會選擇食盆菜，難得新年，食豪華啲又有咩所謂吖？即刻介紹多間米芝蓮獲獎餐廳同埋酒店級嘅盆菜畀大家先～（如果想食得溫馨住家啲、支持下小店嘅可以睇呢篇：撐小店！5大街坊盆菜推介）

米芝蓮級：

嘉麟樓 一品盆菜

名酒店餐廳推出嘅一品盆菜，仲好細心咁分別供應二、四或八人份，無論幾多人食都無問題～盆菜包括五頭鮑魚、花膠、海參、蠔豉、海蝦、柱甫、切雞、燒鴨、發菜、鯪魚球、蘿蔔、冬菇、豬皮、枝竹同高湯，聽到都覺得豐富，溫提大家要早24小時預訂呀。

都爹利會館 至尊賀年盆菜

盆菜以傳統砂鍋分層盛載，包括多款矜貴食材：紅燒五頭南非鮑魚、桂花蜜餞金蠔、蠔皇北菇婆參、濃雞汁炆魚肚、蘿蔔吊片炆腩仔齋根、蒜子柱甫、乾燒海蝦、發財丸子同鮮魚露崛雞等，鮑魚彈牙又入味，濃雞汁炆魚肚每一片魚肚都索晒汁，每一款單項食物都好有誠意。

京川滬廚房 王子新春團年盆菜+王子新春團年升級盆菜

王子新春團年盆菜及王子賀歲團年升級盆菜設六人或十人份量，兩款盆菜各有千秋，每日由大廚新鮮即製～升級盆菜一共有19款食材，超豐富！包括30頭吉品乾鮑、乾煎大虎蝦、花膠、野生竹笙、日本遼參、波蘭鵝掌、炆豬手等。日本吉品鲍彈牙又鮮甜，大虎蝦經過猛火乾煎，香脆又惹味。波蘭頂級鵝掌皮脂豐厚，配埋濃厚嘅鮑汁真係無得輸。

酒店級：

東來順 麻辣海鮮盆菜+羊肉風味盆菜+金湯素盆菜

想有啲新意嘅，可以諗諗呢間酒店餐廳，三款特色盆菜中，最特別嘅係麻辣海鮮盆菜，以秘製麻辣醬汁炮製，包括海參、亞拉斯加蟹腳、花膠、海中蝦、木耳、日本蘿蔔及香烏筍等，未食已經香氣撲鼻～另外羊肉風味盆菜加入羊腩肉、手抓羊、羊肉丸、羊雜同羊肉餃子等，鍾意食羊嘅朋友必食！

樂雅軒 富貴金裝盆菜+「泰」富貴泰式盆菜 

泰式盆菜大家又食過未？呢間餐廳推出創新泰式盆菜，以傳統冬蔭功湯底配埋泰式食材，包括泰國大頭蝦、花膠、海參、帶子、金不換魷魚鬚、滷水豬手、牛肉沙爹串燒、泰式去骨海南雞、紅燒鴨同黑豚豬頸肉等，又幾有新鮮感。

富豪酒店 新春盆菜

呢間酒店推出三款極品鮑魚盆菜，包括極品鮑羅萬有盆菜、原隻三頭鮑魚龍蝦盆菜同原隻花膠鮑魚盆菜，選用多種矜貴食材包括澳洲原隻三頭湯鮑魚、上湯焗龍蝦、14-15頭花膠及海參等。另外仲好貼心咁推出素盆菜，選用雲南天然菌類，包括羊肚菌、榆耳菌及黃耳菌等食材，好味又健康。

帝港集團 風生水起龍蝦撈起

除咗盆菜，同樣好意頭嘅重有寓意來年撈得風山水起嘅撈起。餐廳大廚特別創作龍蝦撈起，選用本地乳龍蝦，肉質鮮甜，配上黑魚子、三文魚子同蛋絲等配料，色彩豐富啱晒相機食先。撈起特別配以秘製柚子汁，味道清新，食完零舍開胃。

文: Yanica