美食博覽2022今日揭幕！一連五日可以嚟買多款特色美食餐飲，今年展場同樣分為公眾館同尊貴美食區，上次同大家詳細介紹有咩$1優惠、福袋同特色新品，而家睇埋有咩必買推介，包括打卡甜品、手工啤酒、精品咖啡、日台水果，同中秋禮盒！
 

公眾館（Hall1A-E，3B-C）

特色甜品

圓缺雪花酥禮盒（$108/1盒、$204/2盒）

呢個本地雪花酥品牌推出三款中秋禮盒，最特別嘅係呢款禮盒裡面有中秋限定嘅五仁口味！另外亦有原味奶香、抹茶草莓、鹹蛋肉鬆、Tiramisu，一盒共有18粒。另外亦可以散買（$69/100g），全部都係香港自家工場每日新鮮純手工製造，港式奶茶、薑汁撞奶、曲奇Oreo等都可以一試。

攤位：Nebu Limited（1C-C13）
 

手工曲奇（$32-38/件，$100/任選三件曲奇+甜點）

呢個本地曲奇品牌最近新推出雙重朱古力麻糬曲奇，顧名思義中間係有麻糬啊！另外亦有經典朱古力、日本宇治抹茶白朱古力、花生朱古力、士多啤梨朱古力、伯爵茶朱古力等口味。

攤位：曲奇阿嬸（1D-A12）
 

粉圓牛奶布丁包（$20）、日式布丁燒（$22/件、$40/2件）

大班今年唔單止賣月餅，重將平日舖頭最好賣嘅布丁包同布丁燒帶到會場。布丁包更有原味，同三款會場限定：粉圓、海鹽焦糖、黑糖麻糬，總有一款啱心水。布丁燒分量適中。

攤位：大班麵包西餅有限公司（1C-E02）
 

時令水果

50年老欉文旦茄芷袋（$80/袋）

50年老欉文旦精緻禮盒（$250/盒）

台灣文旦出名，特別係呢個牌子更精選產自麻豆、樹齡50年以上嘅老欉文旦。而家表面係青黃色即係未熟，等到表皮乾黃即係甜味釋放就食得喇！

攤位：台北貿易中心（1D-C24）
 

山梨縣蜜桃（$65/2個）、北海道蜜瓜（$120/粒、$600/箱）

當然唔少得時令日本水果，攤檔員工表示日本桃最好賣，唔單止價錢相宜，甜度亦達11-12度，香甜多汁。另一推介係北海道蜜瓜，甜度達15度！

攤位：味珍味(香港)有限公司（1B-C02）
 

急凍美食

威靈頓三文魚月餅、威靈頓牛柳月餅（各$258/盒、3盒9折、6盒85折）

如果覺得傳統或者奶黃月餅有啲悶，可以嚟試試Phoebe’s Kitchen威靈頓月餅！三文魚更係今年新出嘅口味。月餅外皮酥脆，牛柳版採用軟嫩多汁嘅牛里脊肉，肉同酥皮中間係巴馬火腿、白蘑菇、鵝肝及黑松露醬等。三文魚版就加入忌廉芝士菠菜、水牛芝士同巴馬臣芝士，芝味十足。

攤位：黑酢家（1D-B28）
 

白飯神偷醬油蟹（XXL $499/盒），醬油蝦（$249/盒）

韓國人覺得醬油蟹特別惹味最啱送飯，所以有白飯神偷呢個稱號，而呢個品牌就選用韓國仁川海域嘅梭子母蟹製作，再將醬油蟹以急凍方式由韓國直送到港。按唔同大細定價，識食當然要食最大嘅XXL，蟹膏最多最甘甜！

攤位：金泫有限公司（1B-A14）
 

Nanna’s黑莓蘋果批、Nanna’s 經典蘋果大批（各$50/件）、輕便裝費城牛肉芝士批、輕便裝費城牛肉芝士批（各$100/3包）

蘋果批同牛肉芝士批都係今年新出，蘋果批係澳洲製造，無添加人工味道或色素；牛肉芝士批就係選用100%澳洲牛肉製作，外層鬆脆裡面有豐富肉香。而圖左邊嘅小籠包同芝士蒜蓉包都係熱賣之選啊！

攤位：京士(香港)有限公司（1B-D22）
 

酒類精選

台灣蔡氏釀酒、啤酒頭釀造啤酒（$100/3支）

唔單止本地，場內亦有台灣嘅手工啤酒，特別啲嘅有蔡氏釀酒馬告白啤酒，馬告係台灣原住⺠煮食會用到嘅香料，帶黑胡椒、薑同檸檬嘅香氣。

攤位：開瓶吧！（1A-D27）
 

Santero 9.5.8 Extra Dry Sparkling Wine

呢支係意大利品牌嘅白葡萄汽酒，同Emoji合作，見到上面印滿搞鬼Emoji圖案可能都會估到，呢支係專門設計畀大家三五知己開Party嘅時候暢飲嘅，味道酸酸甜甜咁易入口。

攤位：朗曼酒業(亞洲)有限公司（1C-C28）
 

尊貴美食區（Hall 3B-C）

必買甜品

椰絲果仁脆脆（$100/盒）

呢個百年椰子品牌唔單止有各款椰子糖同椰子雪糕，今年更首度推出全手工製作嘅椰絲果仁脆脆，負責人指一打開就會聞到好香椰子同南瓜子、葵花籽等果仁香，加落雪糕度做Topping最正！

攤位：甄沾記香港有限公司（3B-E02）
 

日本蜜瓜希臘乳酪芝士蛋糕（$108）

中環嘅希臘乳酪芝士蛋糕專門店亦將佢哋嘅蛋糕帶到會場，包括最出名同最啱打卡嘅日本蜜瓜希臘乳酪芝士蛋糕！層次分明而且甜而不膩，皆因係用咗Greek Yoghurt混合忌廉芝士製作，比一般芝士蛋糕嚟得輕盈。

攤位：Lanala Sweets Limited（3C-A04A）
 

精品咖啡

The Moon中秋禮盒（$380，會場限量50盒）

就快到中秋，呢間精品咖啡店都推出中秋禮盒，有齊SOE咖啡畀大家配月餅。裡面有一包Ideaology嘅剛果水洗咖啡豆同五個Coffee Obsession嘅掛耳包。月餅就有台灣土鳳梨威士忌合桃月餅同桑莓腰果月餅，前者用咗Talisker 10年威士忌製作，提升味道層次。

攤位：Coffee Obsession（3C-A21）
 

12星座專屬咖啡掛耳包（$20/包）

本地咖啡品牌Harmony Coffee同木衛二談星館推出嘅星座咖啡，包裝有齊12款最啱送畀朋友。咖啡豆都係本地烘培，出產地就就按星座種類，火象星座係埃塞俄比亞中淺烘焙、水象星座係哥倫比亞同危地馬拉中烘焙、土象星座係埃塞俄比亞淺烘焙，風象星座就係巴西深烘焙。

攤位：磨刀市場推廣（3C-A12）
 

酒、梳打精選

草本湯力水（$20/罐、$30/4罐），有汽香水檸檬鐵觀音（$24/罐、$80/4罐）

本地新品牌閣樓釀造主打自家研發罐裝酒品，最出名嘅係大家可能都喺Cafe見過嘅草本湯力水，加咖啡或者加酒飲都咁爽。另外特別推介佢哋嘅有汽香水檸檬鐵觀音，用香港嘅香水檸檬加上原片鐵觀音茶葉製作而成。另有試飲套裝可以一次過試到五款飲品啊。

攤位：Hong Kong Cannery Limited（3C-B16）
 

Citrus Trance（$30/罐）

少爺啤最新出品，係呢罐用新鮮西柚釀造而成嘅Gose酸啤。亮點在加入微量鹽之花，帶出酸甜微甘嘅柑橘風味！最啱呢個夏日飲啊。

攤位：Liquid Reinwentions Limited（3C-B15）
 

芒果檸檬馬鞭草Pale Ale（$35/樽）

英國Savoursmiths薯片（$50/2大包、$100/6細包）

大圍啤新出芒果檸檬馬鞭草Pale Ale，專為夏日而設，味道清新。飲啤酒當然唔少得薯片，佢哋更特別代理呢款英國薯片，而家出面未有得買，會場獨家啊！有七款唔同選擇，包括Wagyu Beef & Honey Mustard、Truffle & Rosemary、Italian Cheese & Port、Bubbly & Serrano Chilli等，都係坊間較為少見嘅特色口味。

攤位：大圍啤酒廠有限公司（3C-B10）
 

Dragon Water Spiked Seltzers（$20/罐）

Dragon Water係罐裝有氣雞尾酒品牌，熱賣No.1口味係香茅檸檬味，飲落味道好似⻘檸皮香氣突出嘅瑪格麗特，清爽消暑。另外柚柑薑味有柑橘果皮香，清新味道加上刺激口感，係唔少女士嘅最愛。

攤位：Double Haven Brands Limited（3C-B12）
 

蒼天伝大吟醸（買2支或以上半價$280/支）、日本罐頭（$60/3罐、$100/6罐）

日本清酒亦係唔少人嘅最愛，呢支嚟自宮城男山本店嘅蒼天伝大吟醸特色係香氣華麗、口感圓潤，精米步合35%，建議凍飲、配搭刺身同壽司。呢度亦有日本罐頭，唔少都係味噌煮或者醬油煮，重口味最啱送酒！

攤位：利楊飲飲食食有限公司（3B-F09）

第32屆美食博覽

日期：2022年8月11日 (星期四) 至15日 (星期一)
地址：香港島灣仔博覽道1號香港會議展覽中心
購票指南及入場守則：https://bit.ly/3cYoLvP
衞生措施及健康資訊：https://bit.ly/3Bxj95Y

文：Cathy.H
相：Sunny