尊貴美食區
蝸牛子醬 宏展（3B-D16）
魚子醬就成日聽，蝸牛子醬真係好少聽，最初只係法國高檔餐廳先有得食，後嚟慢慢傳到其他歐洲國家，而家仲傳到嚟香港添。呢個真係要介紹下，蝸牛子醬米白色一粒粒細細粒咁好似珍珠，食落幾有口感，仲有啲青葉味，係特別嘅。
法式甜品 Chocolat-ler（3B-F01）
甜品控要留意下，呢個攤位好多甜品食，各款鮮果撻朱古力撻核桃撻焦糖布甸撻都有得食，另外仲有6種口味嘅閃電泡芙，全部啲樣都好靚好吸引，唔小心行過見到就會好想食。
公眾館
芋圓冰 程班長（1A-B06）
程班長牛肉麵好食應該唔係咩新聞，不過佢哋有新嘅台灣美食出呀，仲要係……芋圓冰呀！大大粒兄芋圓好鬼煙韌，溝埋啲菠蘿冰一齊食就更加perfect池，甜度適中，啱晒而家咁熱嘅天氣。另一款新美食就係蛋餅，同樣都係好香口。
出前一丁新產品 日清（1D-B02）
日清杯麵大家可能食得多，不過佢哋最近出嘅新產品你哋又試過未先？除咗我哋早前都介紹過嘅杯麵味薯片同棒丁麵之外，仲有水餃呀，水餃有小白菜豬肉餃同椰菜木耳豬肉餃，唔知咩味嘅唔使驚，我都唔知，不過我知現場有得試食。
日本直送鮮果 高盛（1E-E01）
鍾意食生果嘅都會知道，日本生果又大又甜，呢個攤檔就專賣日本直送嘅生果嘞，包括有香印青提、巨峰提子、水蜜桃同蜜瓜，全部都大大個，食落仲好多汁。
貓山皇榴槤芝士撻 一方食品（1A-D20）
上年人人追捧嘅芝士撻，而家再嚟一個變奏版——榴心芝士撻，加入埋流心嘅榴槤呀。突然發現，原來榴槤同芝士唔止顏色好夾，連一齊食都好夾㗎！呢個撻到時會即場焗製，熱辣辣出爐食係正嘅，聽講仲係美食博覽限定美食嚟。同檔仲有榴槤月餅同榴槤蓉都做緊特價，榴槤迷自己認住喇。
手作珍珠奶茶
呢幾支好靚嘅嘢飲，係Color chacha新出嘅果汁芭樂，不過未必個個都鍾意，但鍾意嘅人就會好鍾意，點解？因為4枝都係用蕃石榴調製出嚟㗎。火龍果x番石榴、芒果x番石榴、仙草x番石榴，仲有一支犀利喇，係蕃石榴x蕃石榴呀！飲落都幾清甜同解渴。就算你唔好番石榴，都仲有手作珍珠奶茶你揀，仲有黑糖、紫薯、好立克同黑芝麻幾隻味。
貿易館
法國超鮮生蠔 寶達（5C-C36）
如果你以為貿易館冇嘢食，少年你就真係太年輕。喺貿易館裡面，有檔賣法國生蠔嘅，海水味同蠔味都好重，仲好鮮添呀。媽呀我想食。
文：Kar
隨時接收最新資訊
讚好OpenRice專頁！