 | 煮事．自作煮意 寶兒，八十後煮人及記者。曾參與首屆法國工作假期，以文字、食譜和攝影發掘各地好滋味。新作《出走，走進法國人家廚房》。fb專頁：cookstuffs |
香港賣龍蝦包的舖頭越來越多，不過細細個包都賣成兩百幾三百蚊，食落就有啲肉赤。但其實龍蝦包一啲都唔難整，而且越來越多超市有得賣急凍龍蝦，大部分仍然keep得到龍蝦鮮味，買一兩隻回家整，兩個人食夠晒霸氣。
對龍蝦包Lobster Roll的回憶源自去英國時，一個人在街上行到好肚餓，又沒什麼心情入餐廳，發現了像快餐店一樣的龍蝦包店，隔兩條街就有一間，心諗難道英國人食龍蝦真係當食生菜？一試先知，10鎊（當時計約港幣120元）一個塞滿滿龍蝦肉的Lobster Roll，大啖一咬，龍蝦肉就好似山泥傾瀉咁跌出來，沙律醬又唔漏而且味道獨特，連個包都充滿牛油香又鬆軟又香脆，真係食過番尋味，於是兩日內就連續食咗兩餐龍蝦包，嗰種滋味仲懷念到𠵱家。
急凍龍蝦除了用來煮龍蝦湯，其實用來拆肉做餡一樣得，只要輕輕用沸水烚過，去一去雪味即可。然後將龍蝦拆肉，切成大粒，比較有咬口，而波士頓的龍蝦品種都有大鉗，鉗肉又大又厚身，方便拆肉，到大啖咬包時就可以食到啖啖肉，超級滿足。至於醬，貪快可以用沙律醬，不過跟食譜做的秘制蛋黄醬就更惹味，而且最好將蛋黃醬撈好龍蝦肉後，放入雪櫃雪1小時，會更入味。英國就有龍蝦包專用的Bun，麵包較厚身又帶甜味，有點像法國的brioche，不過香港不易找到，但我也同時發現，麵包鋪常見的甜排包其實味道很近似，不過就要找厚和短身而且未切開的排包先最易夾。而且關鍵是，一定要加牛油將排包兩邊煎脆，咁先正宗好味。
材料：（2人份）
龍蝦 1-2隻
西芹 半條切粒（可換成其他材料，如粟米、紅蘿蔔粒等）
葱粒 少許（可省略）
火箭菜／沙律菜 少許（可省略）
鹽、黑胡椒 適量
熱狗包／厚排包 2個
牛油 1小塊
沙律醬／秘製蛋黄醬 3湯匙
秘製蛋黄醬材料：
蛋黃 1隻
Dijon芥末 1茶匙
Paprika 紅椒粉 1/3茶匙
龍蒿香草 少許（可換成其他香草或省略）
檸檬汁 1/2個
檸檬皮 少許
橄欖油 半杯（約150毫升）
鹽、黑胡椒 適量
做法：
1. 將急凍龍蝦烚6-7分鐘，取出後先拆下頭，再取出龍蝦身和鉗的肉，肉切粒備用。
秘製蛋黃醬：
1. 將蛋黃、芥末、檸檬汁、檸檬皮、紅椒粉和龍蒿香草放進攪拌機，打勻至稠身。
2. 先倒一湯匙橄欖油進蛋液，打勻後，再分幾次逐少加入餘下的橄欖油，打至濃稠即可。
組合：
1. 龍蝦肉混入西芹粒、葱粒、鹽和黑胡椒，再加入秘製蛋黃醬或沙律醬拌勻。可放入雪櫃雪1小時，會更入味。
2. 平底鑊落小塊牛油煮融，放上熱狗包或厚排包，將包的兩邊煎脆。
3. 先在包內鋪些火箭菜或沙律菜，再放入龍蝦肉，即成！
※上述內容純屬作者個人意見，不代表本網立場。※
隨時接收最新資訊
讚好OpenRice專頁！