聽日返風呀，我指韓風，話說呢間喺韓國超人氣嘅鮮果沙冰店聽日就會正式喺銅鑼灣營業，而家首先同大家做定啲「遇韓」措施先！

呢間沙冰店主打鮮果沙冰，杯杯都勁多生果，疊到成座山咁高，好鬼呃like！香港店暫時有4款沙冰揀：士多啤梨、芒果、車厘子同青提，見到真係會唔小心bling bling眼咗。無聊咁數下，一杯有成28片士多啤梨咁多呀~

店員喺開舖前仲特地要飛過韓國總店接受訓練呀，好認真。每杯沙冰即叫即整，要等佢哋逐粒逐粒生果砌上去，可能都要預多少少時間呀！

負責人同開飯仔講，啲生果全部每日新鮮運到，而且仲好講究，士多啤梨呢就係韓國嚟嘅，因為韓國嘅士多啤梨長身啲，個形靚啲。而青提同車厘子就係美國嘅，就連size幾大粒都有要求㗎，如果太細粒或者太圓嘅就用唔到嘞。至於芒果就係嚟自菲律賓嘅，因為夠甜。另外，啲cream就係由韓國空運到之後，再打發嘅，而沙冰就加入咗韓國嘅鮮果醬去整，所以成杯食落都係好新鮮同好清甜嘅生果味，可惜啲cream就好似多咗少少咁啦，如果可以多返啲沙冰平衡返，成件事應該會再開心啲！

一杯$88，而士多啤梨味更加要$128，係有少少貴嘅，不過講真份量都幾大杯，兩個人些牙就啱啱好。

餐廳除咗有沙冰，都仲有咖啡、茶同果汁選擇。其中呢杯西柚汁都相當吸引！有半個西柚放咗喺杯頂，可以一邊飲，一邊拮埋啲果肉食，酸酸甜甜，又有少少澀口咁。



開業初期都會係以韓國嘅menu為主，不過負責人話，之後就會陸陸續續推出香港限定㗎喇！好期待！

Cafe de paris
地址：銅鑼灣登龍街18號v-point地舖5號

文、相：Kar


其他新店介紹：
全港首間churros專門店本月開張 變身日系churros衝擊味覺
遊日必食人氣蜜瓜包 登陸銅鑼灣開分店！
麵麵麵麵 自己杯麵、即食麵自己整！率先試玩機場新開工作坊（有片）




 

隨時接收最新資訊
讚好OpenRice專頁！