【手信巡禮】去泰國買呢啲先叫泰享受

唔知幾時開始，去泰國做個Spa嘆個Tea已經變咗生活享受嘅指標之一。而且泰國嘅超市又大又齊，的確非常好行。幫自己個零食倉補貨之餘，又要買手信比朋友同事親戚嘅話，不妨嚟睇睇開飯仔介紹，唔洗煩咁多，就可以留多啲時間繼續玩啦！

手標泰式茶

泰國有唔少價廉物美嘅特色美食，奶茶就係其中一種。比香港奶茶甜而且多一種風味。想將呢種味道開心Share比朋友嘅話，就可以去超市買呢款手標泰式茶，泰國唔少街邊檔口或者餐廳都係用呢款茶葉！有大嘅罐裝同細嘅包裝，而且上面有英文介紹沖調方法。提埋你，沖泰式奶茶記得要加煉奶，咁就更似泰式正宗味道啦。

MAMA 即食麵

輕身又平價嘅即食麵，係派比朋友同事嘅手信選擇之一，到泰國必買嘅就係最出名嘅MAMA即食麵。口味方面可以跟住美國即食麵達人Hans Lienesch嘅推介嚟買，分別係2013年第10位嘅泰式鮮蝦酸辣味，2014年第10位嘅冬蔭功味，同2015年第8位嘅綠咖喱味。咁啱三款口味都非常有泰國特色，買多包自己懷念下泰國美食都得。

Thai Aree 船麵

另一泰國廉價美食代表就係船麵，如果身邊有鐘意下廚嘅初哥，就可以買一盒有齊麵同醬料嘅Meal Kit，煮嘅時候自己加餸就得。之後試上癮嘅話，直接買一大樽醬料，自己任意搭配亦得，得咗。呢個牌子嘅醬料勝在口味比一般泰國牌子甜少少，近返大部分香港人口味。如果係重口味人士，可以加辣椒醬，一樣有泰式Feel。

藍象醬料

再進階啲，送比經常下廚嘅朋友或者親戚，就可以揀泰式嘅醬料同香料，因為唔少泰菜嘅精髓就係醬汁！最多人推介嘅係佢地嘅綠咖喱，平時偏甜嘅日式咖喱或者重香辛嘅印度咖喱可能都食唔少，泰式綠咖喱唔單止顏色少見，較柔和清新嘅味道亦係特色。唔知點調校嘅話，買包醬料包就輕鬆解決啦。

泰國皇家水果乾

明白唔係個個都鐘意自己煮飯嘅，所以就到零食手信出場啦！泰國超市有唔少水果乾選擇，各有特色，如果第一次買嘅話推介呢個牌子。一嚟比較天然，唔少人試過都話味道唔太甜。二嚟口感唔似其他水果乾咁乾，而係中間仲有少少濕潤亦比較煙韌。有大熱嘅士多啤梨、芒果、清新嘅番茄同比較少見嘅番石榴選擇。

Lay’s 薯片

講到零食，薯片一定係最受同事歡迎嘅選項之一。去到外國就梗係要買香港無嘅特別口味啦，最有泰國特色嘅限定口味就係泰式辣海鮮檸檬味，一入口首先會受到辣味嘅刺激同食到啲海鮮味，之後檸檬嘅清新酸味會慢慢滲出嚟，無諗到薯片嘅味道層次都可以咁豐富！而且之前仲出咗Lay’s Smile包裝，啱哂一班Friends一齊玩Selfie。

泰國口味 PRETZ & POCKY

固力果嘅百力滋喺泰國都有唔少特別口味，例如鹹味嘅PRETZ就有冬陰功同泰式沙律，甜味嘅POCKY就有芒果同香蕉朱古力。勝在價錢比香港平時買嘅平一大截，而且細細盒又輕身，唔會加重行李箱負擔。不過要注意，同老大哥花生或者Bento魷魚片一樣，部分香港零食店都已經有得買，除非大量入貨，唔係嘅話其實返香港買都得嘅。

隨時接收最新資訊
讚好OpenRice專頁！