各位美少女戰士嘅Fans又多個藉口、唔係、係理由飛一轉日本啦，日本Q-pot Cafe而家推出期間限定嘅美少女戰士主題甜品，每一款都係代表一位美少女戰士人物，賣相精緻得嚟仲特別有意思㗎。

Q-pot係首飾品牌，唔知係咪因為咁，旗下Cafe賣嘅甜品賣相都特別吸引。例如呢個士多啤梨慕斯以美少女戰士變身器做靈感，紅色愛心見到都心心眼，仲要再加多塊變身器造型白朱古力，對Fans嚟講無得輸！

另外呢個粉紅色嘅芭菲，你又估唔估得出係以豆丁兔做靈感？

呢杯特飲上面白色代表阿提密斯，下面紫色代表露娜，最特別嘅唔單止係上面嘅貓耳，而且搞勻之後嘅淺紫色係代表兩隻貓嘅女帶安娜！

另一杯特飲就賣夢幻，有漸變顏色仲有隻蝴蝶，唔係唔相機食先吖嘛？

多人一齊去嘅，仲可以嗌哂呢三款分別代表天王遙、海王滿仲有冥王雪奈同土萌螢嘅朱古力拼盤，放落印住手掌圖案嘅碟上面，望落更加似首飾。

最後仲有得又食又拎，玻璃樽嘅奶茶慕斯，曲奇同金平糖都可以用嚟做手信送畀一樣鐘意美少女戰士嘅朋友。不過Cafe採取預約制，Fans去之前記得先上官網訂位，唔好摸門釘呀。

Q-pot.×SAILOR MOON dream collaboration vol2.
活動日期：即日起至2016年8月17日
地址：東京都港區北青山3-10-2 (表參道站B2出口)

資料來源：Q-Pot.