疫症已經橫行咗超過一年，對我哋嘅日常生活當然有好多影響，亦改變咗大家唔少嘅習慣。不過即使喺疫情下，我哋都可以從新常態中，尋找趣味！年度盛事「OpenRice優秀開飯熱店大賞」即將開始接受投票喇，今年以「日嚐作樂」為主題，希望大家從每日品嚐到嘅美食中創造樂趣，從探索餐廳中感受香港「味」力。3月24號就開始可以一人一票投選你心目中嘅本土出色熱店！

過去一年真係開咗唔少咖啡店，由精品咖啡到朝啡晚酒等唔同風格都有；同一時間小食店就開始多咗專門店，主打一至兩個種類食物或者飲品。假日無論想去Cafe Hopping定去掃街，都可以參考今年「OpenRice優秀開飯熱店大賞」嘅入圍名單，以下入圍餐廳你又去齊未？
 

咖啡x美食x酒吧  Doubleshot by Cupping Room

本土咖啡店Cupping Room Coffee Roasters以全日餐飲為概念開設嘅餐廳，糅合咖啡、美食同酒吧三大元素。全部Espresso都採用單一產區嘅咖啡豆，手沖咖啡更會有自家烘焙嘅比賽級咖啡豆選擇，Cocktail當中嘅招牌Spent Martini亦加入自家製咖啡酒。
 

黑白主題Cafe  Contrast

唔單止深水埗多Cafe，行過少少嚟到長沙灣同樣有呢間人氣咖啡店，裝修以黑、白、灰為主調，不時仲有攝影或畫作展覽。食物亦加入黑白元素，好似糯米窩夫加入竹炭粉變成黑色再配白色嘅牛奶雪糕。必食雞蛋布甸配House Espresso，焦糖香同咖啡好夾！
 

純素堅果奶蓋茶  NUTTEA  

圖: 餐廳Facebook

台式飲品都可以好健康，呢個品牌就嚟自台灣，提倡無動物含量嘅環保飲食理念。用腰果、核桃、榛子、杏仁同夏威夷果仁打成堅果乳同堅果奶蓋，代替奶製品去製作飲品。第一次飲可以試熱賣之一四季春堅果奶蓋，食得出奶蓋嘅堅果香之餘，配茶香清新嘅四季春味道啱啱好。
 

香港製造乳酪飲品  長洲角酪

圖: 餐廳Instagram

今年唔少人飛唔到去外國，放假就會去離島玩，去到長洲就有呢間人氣小店，主打每日自家製作嘅新鮮乳酪，配搭時令水果。好似招牌莓莓角酪就有士多啤梨，酸味唔嗆喉仲帶士多啤梨甜香。另外仲有同店內「長洲港鐵站」打卡牆襯晒色嘅角酪卷，口感輕盈甜而不膩。
 

漲卜卜吐司盒子  E FOR EGG 

圖: 餐廳Facebook

睇餐廳名應該就估到呢間小食店以雞蛋做主題，主打即叫即整嘅盒子吐司，由於要加牛油逐面將吐司盒子煎至金黃色，製作需時，但依然長期都有人龍排隊等！因為吐司放滿唔同餡料，打卡一流！除咗招牌三重芝士滑蛋吐司係必食之外，小店有時仲會推出期間限定口味呀。
 

想支持心水餐廳，記得注意返投票日期：
菜式及新餐廳組別：3月24日 – 4月6日
地區組別：4月7日 – 4月20日

您亦可以分享一張與美食的快樂時刻😋到個人FB/IG (必須設定為公開)，加Hashtag #日嚐作樂 #OpenRice。完成整個投票活動後，即有機會贏取獎品總值超過30萬！

*活動須受條款及細則約束

文：Cathy