情侶喺香港想搵個地方撐下枱腳，唔係超高消費就係毫無情調？其實又唔一定嘅，不如行多兩步去工廈餐廳，一嚟環境闊落啲坐得舒服啲，二嚟唔少工廈西餐廳出品都相當高水準，加埋餐廳各自嘅主題特色，包你同另一半都揀到心水！
觀塘清新小鹿主題 Deer Kitchen
平時陪女朋友去卡通主題餐廳覺得唔抵食？咁呢度就啱哂啦，既有鹿做主題啱哂Selfie之餘，簡約嘅黑白綠主調絕對唔會令男士們尷尬，最緊要嘅係佢地嘅二人套餐相當豐富，有齊有兩款前菜、餐湯、龍蝦加兩款主菜同甜品。或者散嗌秘制虎蝦天使麵或者慢煮牛柳拼芝士焗龍蝦，再加碟黑松露意大利雲吞亦得。
觀塘高CP值舒適Cafe Lava Java 咖啡西餐廳
圖：<IVY>
如果想搵間Cafe Hea一個下晝嘅話，呢間會係其中一個好選擇，裝修以木同白色為主夠Relax。頭盤必揀法式田螺焗酥，Bite-size趁熱食特別酥脆香口，主菜就可以揀香脆帶天然甜味嘅軟殼蟹南瓜汁扁意粉，或者啖啖肉又惹味嘅韓式芝士漢堡。最後如果鐘意相機食先嘅話，一定要嗌三眼仔抹茶鮮奶同龍貓朱古力啊！
黃竹坑工業風餐廳 3/3rds
呢間餐廳走工業風，Raw得嚟枱櫈又幾有特色，因為隔離就係傢私店，睇啱即刻買走都得。大玻璃窗出面主要係山同樓景，但日頭嚟哂下陽光都幾寫意。嘢食選擇唔多，以輕食例如湯同沙律為主，最抵食嘅係Pizza，薄批底非常香脆。不過唔少菜式都係用即棄餐具要扣分，而且定價稍高，自問特別唔鐘意食環境嘅朋友仔要三思喇。
觀塘私房式Fusion菜 Private K
圖：望羊
呢間餐廳夠多人嘅話可以包場做私房菜，但下晝嚟食個私房式嘅Lunch Set一樣得。餐廳好有住家Feel，有梳化電視機同Open Kitchen！嚟食嘢仲可以順便偷師。老闆兼大廚精通中英日泰各地菜式，所以Menu都會不定期更換成唔同Fusion主題，例如之前泰式主題就有挪威煙三文魚泰式忌廉長通粉，帶酸辣嘅醬汁零舍開胃。
荔枝角寧靜澳洲西餐 Bondi
普通西餐就食唔少，澳洲式嘅又會唔會有興趣？呢間餐廳以澳洲一個海灘為名，佈置亦有袋鼠同樹熊圖案，最重要係環境夠舒適寧靜。無論係Lunch定Dinner Set選擇都唔少，澳洲手打牛肉芝士漢堡嘅漢堡扒Juicy得嚟唔易散，配埋香脆薯條夠飽肚。烤焗豬鞍架配秘制蘇梅醬配搭得宜，酸酸甜甜嘅蘇梅醬同肉質嫩滑嘅豬鞍非常夾。
觀塘浪漫精緻西餐 i kitchen
如果你女朋友或者你本人胃口比較細，貴精不貴多嘅話，就可以嚟呢間餐廳。裝修雅緻而有情調，食物分量唔大但勝在每一碟都有精緻賣相，色香味方面先贏一分。而且選擇都有唔少，連普通扒房都比較少供應嘅威靈頓牛柳都有，酥皮夠乾身而裡面嘅牛柳亦鎖到肉汁，食落完全唔韌。
荔枝角炭燒靚扒 Number Fifteen
根據非正式統計，唔少男士都係食肉獸，想鋸靚扒除咗可以去扒房之外，仲有呢間工廈餐廳可以一試。裝修以白磚同木做主題，簡單而不失格調。佢地嘅碳烤豬扒同牛扒都係唔少食家嘅推薦，炭燒美國特級西冷有陣陣炭燒香，炭燒西班牙黑毛豬肉眼分量十足，連前菜鵝肝多士都煎得香口而唔油膩，值得一試。
文：Cathy
開飯編輯推介：
2. 12月份好評餐廳十強
熱門文章推介：
隨時接收最新資訊
讚好OpenRice專頁！
