羊生GoGoGo的個人專頁

實在太鍾意食港式嘅芝士焗龍蝦伊麵底，今日嚟到西營盤坤記，得兩條友食晚餐，唔想叫兩個煲仔飯咁寡，所以就叫咗其中一個佢地嘅特別介紹：芝士上湯中蝦(伊麵底)，順便試試個小菜廚嘅功力，另外叫一個白鱔排骨臘腸煲仔飯。一如所料，煲仔飯要等好耐，芝士蝦先上枱。嘩，芝士蝦都用煲仔上，熱辣辣，誠意十足。但放低一睇，瀨嘢😱，點解個芝士汁會稀如水呢？一問之下，原來佢哋做嘅係有芝士嘅上湯，而非芝士上湯汁。既來之則安之，當然照食可也。芝士上湯，雖然同我想像嘅質感好大落差，但味道竟然係好味嘅，芝士味夠，上湯亦ok。中蝦炸得夠透，可以連殼一起吃掉。伊麵唔會過淋，淥得啱啱好。成件事係中伏了，卻又幾好食😆。🐑白鱔排骨臘腸煲仔飯，所有嘅餸都唔錯，煲底飯焦亦好易起，而且幾靚仔，不過個飯略嫌都仲係濕咗少少，慢火煨多佢5分鐘可能好啲。🐑椒絲腐乳通菜，好味，冇投訴，完。#西營盤 #坤記 #脷安食道 #LeionFoodChannel…查看更多

🐑化皮乳豬，整體發揮出色，好食過好多地方嘅乳豬。即叫即燒，起碼等20分鐘。等待係值得嘅。首先想講講個乳豬醬，唔知咩牌子，特別好食。乳豬皮化呢個冇質疑，咬落去啲豬油爆出嚟嗰下感覺好難忘，就連塊肉都咁好食呢個就實在難得🐑香蔥牛肉角，其實用餃皮包住牛肉球炸。牛肉球內有蔥、芫荽、馬蹄，調味恰到好處。記得點埋旁邊嘅牛肉汁一齊食，牛味100分爆發🐑黄橋燒餅，外皮酥化，芝麻香脆，香蔥肉餡飽滿，但調味略為重手咗少少。黄橋燒餅都係阿一鮑魚嗰個稍勝🐑筍尖蝦餃，大隻、飽滿、精神，個名強調筍尖就堅係有筍尖，明蝦新鮮爽口。價錢同阿一鮑魚一樣，但就冇阿一蝦餃嗰啖汁。蝦餃嚟講，暫時都仲係阿一世一🐑瑤柱蘿蔔糕，蘿蔔味甚濃甚清甜，切到咁大粒，四方八面都煎到咁香脆，睇得出廚師超用心。表面炸咗嘅瑤柱絲超脆，但可惜冇乜味😂。要比較的話，新同樂嘅蘿蔔糕更出色，因為更多臘味…查看更多

第一次幫趁，午市叫咗個白雲魚生丼定食。丼內有深海池魚、油甘魚、真鯛、魷魚及鰤魚，定食包括麵豉湯、漬菜及沙律。先講定食食品，麵豉湯同漬菜都均屬正常，蔬菜沙律一口食落去，出晒事，個「酸」醋汁好甜，係細路仔一定會好鍾意嘅味道，儘管啲蔬菜都係新鮮嘅。好地地有現成嘅沙律酸汁唔好好利用，自己走去加糖調味，正一好做唔做。丼嘅飯都係一樣，正宗細路仔口味，又係偏甜嘅，同埋做丼飯嚟講，溫度佢都算好熱，係好熱，唔係和暖。真係好好奇呢度嘅師傅到底跟咩師傅學師，可能學師未滿，更大可能係學壞師。魚生整體上都算新鮮，只係兩塊深海池魚之中有一塊正常，有一塊少少腥，唔係咁新鮮。魷魚就一定唔太新鮮，兩塊夾起都係軟淋淋，已經失去晒新鮮魷魚應有嘅彈性同埋膠質，唔係好掂。又細路仔口味，又可能學壞師，咁究竟點解呢度Lunch Time都仲係門庭若市呢？我認為有兩個原因：1）荔枝角區嘅日本料理店實在冇乜選擇，附近只有鵜舞。相比嚟講，鵜舞丼飯其實都唔出色，但口味上可能會比金酒屋好一丁點，我要強調，真係只係好一丁點啫；2）我真係老嘞。呢啲細路仔口味，就留番一眾細路仔慢慢品嚐吧！…查看更多

同老婆出深水埗買電話卡，冇乜Idea唔知食乜好，就是但求其撞入一間粉麵舖試試，反正見到都有8成客坐滿，應該唔會點衰，呢個係民間智慧😆。人哋主打牛腩牛什粉麵，我就係偏要反其道而行 - 食飯。🐑咖喱牛腩飯，飯餸分開上，份量好Generous。牛腩起碼有13片，薯仔雖然較出面其他舖頭細粒咗啲，但卻以數量取勝，以成碟飯撈滿汁嚟計算，多到幾乎每兩、三口飯就可以食到一粒薯仔。咖喱菜式薯仔係靈魂，喜歡食咖喱嘅朋友嚟呢度，必定大快朵頤。牛腩係佢粉麵檔嘅原汁牛腩，只不過係淋咖喱汁上面咁解啫，市面上一般有賣咖喱牛腩飯嘅粉麵舖都會係咁做。牛腩特別叫咗肥腩，嚿腩有肥又有瘦係好享受。肥嘅部位油脂豐腴甘香；瘦嘅部位就差啲，比較靭咗少少，但整體上肉質係ok嘅。汁料方面，個咖喱做法係十分港式，有打蓉晒乾蔥頭嘅甜、又有蒜蓉嘅香，仲有蠔油、豉油、咖喱粉混合而成嘅咖喱膽，質感濃稠，而且香濃，特別要Highlight嘅係冇椰汁，辣度十分足夠，應該係我近年食過最好食嘅港式咖喱菜式。咖喱牛腩以外，老婆叫咗碗魚皮餃墨丸河，魚皮餃冇乜特別，反而墨丸幾有驚喜，下次可以外賣一打半打生料番屋企打邊爐。…查看更多

灣仔美麗小廚食評🐑牛蒡淮山甘筍粟米湯，午市套餐全部都有跟例湯，標明係無味精老火湯。湯色夠，味清甜，就連肉都煲到一絲絲幼絲，一定係用時間換嚟嘅成果🐑酸菜牛肉米線，極酸，極辣，超爽超刺激，呢個口味如果煮酸菜魚肯定好好味🐑粟米斑塊飯，粟米，食得出係新鮮切嘅，唔係罐頭貨。個粟米汁，叫咗多汁，你又估佢唔到佢用另一個碗仔上畀我，真係大癲，直頭係多咗碗粟米湯飲😆，好好味喎，因為上湯湯底好靚，不過我個人就喜歡個獻可以推得再杰身啲就再好啲，而家比較稀。魚，堅係龍躉片嚟嘅，炸得金黃，好香，就算連粟米汁一齊食都仍然食到好酥香嘅炸魚味，呢個好出色，可能出色過佢母店峰饍🤭。龍躉有8大塊，呢幾塊魚就咁喺街市買都起碼80蚊，呢度成碟飯都係收你$138，真心抵🐑辣爆雞中翼，其實係避風塘炸雞翼，上枱都幾香蒜蓉味，先聲奪人。叫咗小辣，一啲都唔覺辣，下次可以叫中辣起跳。雞翼全部切晒單骨，食起上嚟好方便，炸得時間剛好，外脆內嫩滑。醃味方面，除咗一般嘅油、鹽、糖、豉油、豆粉之外，更隱藏咗香茅嘅味道，增添了少許東南亞風味…查看更多

東涌樂天皇朝食評🐑蟹粉拌麵，咩嘢都唔使講，太弧寒喇，蟹粉真係少得可憐，數埋一湯匙都唔荒會有🤭，撈完個麵啲蟹粉都唔知去晒邊😆，當然完全食唔到有蟹味啦。跟拌麵嗰個豬骨湯，非常咁奶白色，真係畀佢嚇一嚇，大大啖飲落去，唓！一啲味都冇😆。成個蟹粉麵+湯，可以話好嘥氣，我相信佢其他嘅蟹粉菜式都一樣嘥氣，千祈唔好叫🐑小籠包，香港飲食界啲老師傅唔知係咪移晒民，最近連續兩次食小籠包(東涌樂天皇朝同荃灣三希樓)，師傅手工都唔係好得，包到隻隻岩岩巉巉，個樣古靈精怪都唔似小籠包嘅，不過幸好樂天嘅皮係超薄嘅，而且個餡料都仲保持到好味同好多汁水，咁就放過佢啦🤭🐑沙拉骨，係今晚最出色嘅一道菜，個豬扒來貨好靚，係帶骨肉眼，有肥、有瘦、有筋，入口鬆化唔痴牙，炸得香口得嚟肉又唔柴，沙律醬調味又恰到好處，呢個推薦🐑蔥油餅，蔥夠多又有味，炸得好酥脆，呢個都唔錯🐑鍋貼個肉餡應該係同小籠包嘅一樣，所以同樣味道好，同樣汁水豐富，表面睇亦煎得幾金黃，不過似乎煎得唔夠透，因為食落去個皮比較糊口，一Pat嘢咁，焗多佢兩、三分鐘再上枱都唔怕…查看更多

🐑雞湯小籠包，個包點師傅唔得，包到啲小籠包隻隻岩岩巉巉，賣相唔係咁討好，加上塊皮略厚，頂部摺位顯得特別難咀嚼，儘管已經明顯見到佢已經搣走咗頂部部份嘅麵皮先蒸，但其實係無補於事🤭。好彩個餡料都幾好味，佢特別Highlight係雞湯小籠包，又真係有雞湯味嘅，而且同個調咗味嘅薑絲醋味道幾夾🐑魚湯鮮竹卷，首先飲啖湯，都幾有魚味，又幾有胡椒味，連同番茄一齊食件事好融合。鮮竹卷入面有冬菇、木耳等，雖然係齋菜，但係撈餡撈得好味，腐竹又有濃烈豆味，呢個係好推介嘅🐑布拉香茜牛肉腸粉，佢強調係布拉，我食唔出係唔係，不過值得一讚嘅係，個腸粉確係好薄好滑，牛肉餡料入面有足夠嘅肥豬肉，又香又滑，唯一芫荽方面份量多番少少就更好🐑剁椒魚頭，大魚頭好新鮮，與剁椒嘅鹹辣香味十分匹配，蒸嘅時間又啱啱好，整個魚頭無論魚肉定魚云都好嫩滑，係鍾意噒魚頭嘅人心目中嘅極品🐑擔擔麵，QR Code落單冇得揀辣度，要另外伙計人手落單，系統上我認為需要改善。個碗睇落唔係好大，但其實麵嘅份量就夠晒多，多到我覺得同個碗唔係好成比例😆。個湯幾好味，麻醬足，不過唔係咁夠湯，叫中辣又唔係好夠辣，叫伙計人手落單係嘥氣嘅…查看更多

阿師傅大哥，啲牛切好啲好喎🐑佢嘅牛肉來貨本身係靚嘅，絕對新鮮，絕對油潤，可惜切牛嘅師傅大哥，唔知係太忙太多嘢做定係新手入行，牛肉全部Hea切。首先，好多都切到碎濕濕細細塊，完全失去打邊爐食牛嘅意義；第二，切牛肉時懶理佢三七二十一，橫紋直紋亂切一通，搞到原本有質素嘅牛淥完之後，仲使10秒內淥完，咬落去都好鬼死靭。用心切啲牛，唔係就好浪費其他配料反而唔錯：🐑崩沙腩夠肥，肉質夠滑唔嚡口，非常出色🐑海鮮拼盤，蝦、蠔、蜆、龍躉片，全部新鮮🐑白鱔咪睇佢切條切到衰衰咁，入口好彈牙，肉質雪白🐑水餃夠足料，筍夠爽，蝦大大隻，肉碎肥瘦均稱，好滿足🐑牛丸新鮮手打，調味足，好彈牙🐑豬潤冇刻意啤水，保留豬潤原味，係好耐冇喺出面食過咁好食嘅黃沙豬潤🐑環境方面店方真係要注意下，地板超跣腳，咁多客人出出入入攞醬料、火鍋配菜、飲品等，地下咁滑遲早出事，就算跣親客人或員工都唔係咁好啦😌…查看更多

🐑麻辣公司三文治，如果有食開深水埗新香園的話，一定知佢必食嘅就係三文治，當中又以蛋牛治為首選。仲係試業中嘅旺角店，有個麻辣公司治，將麻辣醬溝入蛋漿，連同罐頭碎牛一齊煎，造成了麻辣蛋牛餡，夾喺其中一層多士之間，公司治另一層嘅餡料係煎午餐肉，三層多士加兩層餡料，就造成了呢個麻辣公司治。蛋牛煎得非常出色，入面仲有少許蛋汁，加咗麻辣更添多一分香辣味，配合煎午餐肉簡直邪惡至極，必吃😆🐑芙蓉蛋飯，相對蛋牛治嘅炒蛋嚟講，呢個芙蓉蛋簡直係有啲失色，煎得唔香，冇脆邊。芙蓉蛋內有火腿、蝦仁、銀芽、蔥段，缺少了韭黃，成件事好唔得。個豉油只不過係普通嘅生抽，冇煮過冇調味過，好唔掂，完全唔建議叫嚟食🙈🐑炸雞翼，醃味幾好，皮炸得夠脆，肉質好嫩，時間炸得啱啱好…查看更多

今年大閘蟹餐第一擊😋🐑金湯蟹皇鮑翅，用小蠟燭喺底部助熱，有心思，魚翅份量超多，幾乎個碗有咁大，整片魚翅就有咁大，目測每碗絕對有三両翅，金湯個獻推得好緊緻，滿滿嘅蟹膏、蟹肉，口感十分豐富🐑清蒸大閘蟹，每人公一隻、乸一隻，每隻約四両重，乸嘅膏就澎湃啲，公嘅膏就綿滑啲，各有擁躉，我就鍾意食公多啲🐑滋味欖角骨，欖角味好香，排骨部位來貨好靚，肋骨位，有肥有瘦，肉質好靚，就算瘦嘅地方係鬆化冇痴牙🐑紅杞泡龍躉球，魚湯奶白，重魚味，瓜方面係水瓜，係勝瓜D friend咁嘅味道，但比勝瓜甜，配搭幾好。龍躉三大塊，都幾大塊，食龍躉最緊要係個魚皮，膠質超重，正喎🐑頂級蟹粉小籠包，略比一般小籠包Size大，鮮肉味濃，蟹粉份量平衡，重薑味，啱晒我，最重點係個肉汁，都真係唔少喎🐑薑茶湯丸，係芝麻湯丸，開蓋已經聞到陣陣薑香，味道夠晒辣，好順喉🐑個餐咁多嘢食，每位$538，抵玩…查看更多

🐑虎珀合桃，呢度高級食府嚟講，算唔合格喇，唔夠香又唔夠脆，發揮唔到堅果應有嘅香味。世一虎珀合桃，係嘉麟樓當之無愧🐑百花脆皮乳豬，每次必點，簡單講就係蝦膠釀喺乳豬皮上炸，蝦膠彈牙、乳豬皮脆口呢啲不在話下，重點係蝦膠與乳豬皮中間爆發嘅嗰陣油香，每次食都係驚喜🐑玉蘭帶子蝦餃，全世界嘅蝦餃，再好都唔會有阿一鮑魚6成嘅水準，所以就算喺新同樂飲茶，都一定唔會叫蝦餃。叫帶子蝦餃就唔同喇，厚身北海道帶子打橫開半，放上開口蝦餃上蒸，帶子時間剛好，唔會靱，估計係後蒸嘅，鮮味甚顯著，帶子味甚至已經向下滲咗入下層蝦餃餡中，帶子+鮮蝦混和嘅味道，是但用個腦諗下都想像得到有幾正啦😆🐑蘿蔔糕，煎得好香，第一啖咬落去，臘味嘅味道喺我口中狂爆，再趙落去就係白蘿蔔嘅甜味。賀年年糕我哋都有喺新同樂買過，必須要承認一點嘅係，自己煎，一定冇呢度嘅師傅煎得咁好食，唔係廢話，係肺腑之言🐑魚翅灌湯餃，嚴格來說，呢個唔係灌湯餃，而係湯浸餃。大餃蒸好，再放入魚翅湯中，湯雖只是二湯，但火腿嘅味道，依然可品嚐得出。接近$170一隻，魚翅放晒喺個湯度，一目了然，份量之多🤯，我自己都嚇了一大跳，太慷慨了吧，絕無冇欺場🐑鮑魚酥，牛油酥皮好香，上枱已經聞得到，超熱上桌，保證係即叫即做。鮑魚雖然切成小塊做餡而非成隻放上面，賣相係扣咗少少分嘅，但好處就係，咬入去個鮑魚味確係好重，絕對可以彌補得到賣相方面嘅缺憾…查看更多

🐑燻蛋，用鴨蛋做嘅，入口超濃煙燻香，蛋黃夠流心，應該算係so far喺香港食過最好食嘅煙燻蛋🐑麻辣小籠包，東來順冇賣豬肉，呢個小籠包嘅餡料係雞肉，麻辣湯幾香濃，咬落去亦多汁、調味足，唔使點醋都可以，不過缺點係皮比較厚，同埋小籠包嚟講，雞肉做餡始終都唔夠豬肉豬餡吸引。另外，麻辣小籠包嚟講，都係川川同后園好食好多🐑雪菜河蝦仁鍋貼，表面睇起嚟煎得好靚，入口都好味嘅，不過唔覺有雪菜味同埋蝦味。同小籠包同一道理，鍋貼都係豬肉餡吸引啲🐑山東手撕雞，首先講講個雞皮，用鹽輕輕醃過，鹹香十足，最仲要係脆口，呢個好難得，雞肉又嫩滑，加埋個蒜蓉甜豉油食係一絕嘅，呢個係嚟過咁多次之後嘅新發現，必點👍🏻🐑嫩雞煨麵，首先，$98咁細碗係有啲貴嘅🤑。食嫩雞煨麵，湯底好坐底已經有70分。呢個湯，係純雞肉白湯，童叟無欺，雞味特濃，絕冇投訴。雞胸肉，正常地嚡咗少少，其實收咁貴，畀雞肶肉代替雞胸肉都唔怕死啦🤭，起碼啲肉一定滑。幼身白麵條就稍腍咗少少，要提醒自己下次再叫嘅時候，記得要求個麵爽身啲，唔好煮咁耐🐑驢打滾，用糯米搓薄，捲著紅豆沙餡，再灑上黃豆粉將糯米紅豆卷喺上面係咁轆係咁轆，就為之正宗驢打滾。呢度嘅驢打滾即點即造，每次必點。記得叫佢地要熱辣辣上枱🤭，叫就梗係咁叫啦，其實暖暖地上枱都已經ok㗎嘞，只係驚唔暖上枱，糯米皮會變硬咁解啫😆…查看更多

🐑櫻花蝦麻醬A菜，其實係櫻花蝦車厘茄生菜麻醬沙律，櫻花蝦嚟講佢都算大隻，其他就車厘茄同生菜都新鮮，現成麻醬又好味，咁就搞掂食碗麵🐑山藥鵝骨湯，雖然話係鵝骨湯，但其實都有好多豬骨嘅，台灣式嘅湯嚟講，佢都算幾有味道㗎嘞😂，淮山係鮮淮山，煲到都好溶爛，尚算不俗🐑滷肉時蔬，係白灼油麥菜加滷肉，菜正常新鮮，點整都ok㗎嘞，滷肉切幼粒，全部都偏肥，送飯食最啱🐑招牌煙燻鵝，要下庄，肉質確實係嫰嘅，嫰得嚟又有彈性，係唯一煙燻味比喺台灣食還欠缺了一些🐑招牌煙燻鵝頭，連埋頸嘅，第一次食鵝頸，原來係好多肉嘅，鵝頭就唔識欣賞嘞😂🐑鵝油拌飯，炸乾蔥頭+鵝油確實好香，飯就稍多水咗少少，要注意一下喔🐑用嚟墊筷子嗰粒花生，剝殼後發現入面嘅花生粒係黑色嘅😆，上網搜尋一下，原來呢啲叫黑金剛花生，食落除咗有花生味外，仲有少許甘甘地，其實幾好食，唔好掉咗佢😁…查看更多

🐑首先個玻璃枱面同埋碗筷全部都黐𣲷𣲷咁，要改善一下🐑冰鎮醉鮑魚，浸得好入味，除咗有濃烈嘅花雕味外，仲加有話梅味，可惜第一步白烚嘅時候過咗龍，有啲靭🐑古早腩叉併腩仔，燒腩仔肥瘦參半，部位幾靚，鹹味亦落足，衰在個皮係硬脆而非鬆脆；腩叉燒得幾好，亦係肥瘦參半，有豐富嘅燒烤味同麥芽糖味，啱我個人胃口🐑海底椰燉竹絲雞湯，佢個湯燉嘅時間好足夠，以湯內赤肉粒都燉到相對夠鬆散，以及連雞骨豬骨都燉到已經化化地嘅情況估計，起碼燉咗超過8個鐘，當然好夠味🐑黃豆醬蒸蟶子，黃豆醬係麵豉醬，幾香濃，蟶子係新鮮嘅，蒜蓉亦有預先畀咗少少底味先入爐蒸，唯一係粉絲浸唔透身，入口頗硬🐑薑蔥班球煲，煲仔夠熱，成個餸夠乾身，不過欠缺惹味，算係合格之上啦🐑欖菜肉崧炒飯，炒得夠乾身，粒粒分明，唔油膩，充滿我最愛嘅美極鮮醬露味，單以炒飯嚟評論，呢個炒飯其實係唔錯嘅，不過以欖菜肉崧炒飯嚟講，冇乜欖菜味又冇乜肉崧，咁就差咗少少嘞🐑九年陳皮百合紅豆沙，都煲得幾綿，不過又冇乜陳皮味，任你講一百年陳皮都冇用…查看更多

🐑龍蝦湯味道都幾濃，而且幾好味，不過我確實真誠地真心認為係罐頭或預製貨居多。預製貨我唔介意嘅，只要攞番嚟嘅貨好味就得嘞😋🐑龍蝦汁鮑魚意粉，如果個龍蝦汁底係用嗰個我確實真誠地真心認為係罐頭或預製貨嘅龍蝦湯做的話，應該係幾好味嘅，好可惜唔係吖，莫講話龍蝦味，就連基本嘅鹹味都冇。意粉又煮到淋pat pat，係港式地道快餐店嗰種囉，如果你話你係想煮港式嘅，你個意粉底一定要用茄汁炒炒佢先，但係你又冇喎，淨係死命咁淥淋個意粉，成個出品係冇意義嘅，亦係一個99%失敗嘅出品。唯一可取嘅就係鮑魚係新鮮嘅，即係街市賣$100一碟有8隻嗰啲囉。🐑牛油炒野菌，撞鬼了，呢個又鹹咗啲啲，攞嚟撈意粉一齊食個味道就可以balance番😂👌🏻🐑烤雞胸沙律，沙律菜係新鮮嘅，呢個冇難度；雞胸係烤得嫩滑嘅，只要調校好焗爐嘅溫度同時間就已經ok，呢個亦冇難度；至於伴碟嘅汁，你識得行去超級市場畀錢買支泰式甜辣醬就得㗎嘞，講真，真心嘅，呢個烤雞胸沙律真係幾好🐑水牛雞翼，呢個應該正名為地們茄汁辣椒仔辣汁撈炸雞翼，完🤗🐑至於點解呢間嘢仲會有咁多人嚟呢？咁呢個就係食客本身有問題囉😆…查看更多