HungToChan的個人專頁

呢日同friend去左屯門呢間居酒屋食dinner，我地點左廚師推介二人餐，估唔到好有驚喜！前菜五色海藻沙律，好開胃，啲海藻又爽口彈牙，食完即刻醒胃，為之後嘅大餐做好準備。之後主角出場啦，威士忌燒蠔一上枱就聞到陣淡淡嘅酒香，真係好犯規！啲蠔燒到啱啱好，唔會過熟，咬落去好juicy，有蠔嘅鮮味，再加埋威士忌嘅醇香，直情係雙重享受！小食點咗個唐揚墨魚咀，呢個不得了！炸到外脆內彈牙，個墨魚咀好有咬口，點埋沙律醬，又香又惹味，一啖一啖停唔到口，送酒一流！脆辣單骨雞翼，方便食又好味，岩哂我呢個懶人。外皮炸到脆卜卜，咬落去有卡滋聲，入面仲鎖住啲肉汁，微辣好過癮，食到舔舔脷。仲有串燒盛，一次過試晒唔同款式。樣樣都燒得恰到好處，有牛肋骨、日本黑豚肉、菠蘿、京蔥煙肉卷、魷魚串，個人最鍾意佢個燒菠蘿，甜甜地又解膩，滿足晒唔同口味嘅朋友。壓軸出場就係個鹽燒白鱔煲仔飯！一嚟到熱辣辣，飯焦香到震！白鱔燒得金黃，魚肉肥美又滑溜，加埋豉油撈飯，真係無得輸！食到連煲底嘅飯焦都刮埋晒，滿足到爆。最後必點呢度好特別既cocktail ，分別點左一日冚包散 - 華夫人同含笑半步釘 - 唐伯虎，個名好盞鬼，亦都超好飲。…查看更多

深水埗呢間金豪港家真係無得頂！呢度啲餸款唔單止夠地道，仲有好正既海鮮，每道菜都好有水準。 首先點左沙巴龍躉加蟶子孖寶，條龍躉魚肉滑到不得了，非常新鮮。蟶子又夠肥美，口感爽滑，配埋蒜蓉通粉絲，送飯一流。另外點咗魚腐浸菜苗，清清地又唔失滋味，魚腐彈牙得嚟又入味，配埋啲嫩綠嘅菜苗，夠哂健康又好味。呢個餸最啱啲想食啲清淡啲嘅朋友，一定會鍾意。 仲有事頭婆炒麵，麵炒到夠乾身，配埋芽菜同蔥，夠鑊氣，食到最後都唔會覺得膩。 最後當然唔少得時令足料湯，成鍋湯好足料，落咗全隻烏雞，仲有雞腳同其他湯料，啲湯底清甜得嚟又有層次，飲完成個人都暖笠笠，好滋補嘅感覺。餐廳仲有早鳥優惠（7:30pm前埋單88折）同宵夜優惠（9:30pm後小炒78折），好抵食啊！…查看更多

呢日同朋友慶祝生日，去咗尖沙咀呢間日式餐廳食lunch，呢度既lunch set幾抵食，人均大慨200蚊。首先點左香蔥吞拿魚腩丼，個吞拿魚腩不得了，入口即溶，啲油花分佈得超靚，好Fresh好甘香！配埋啲香蔥同埋暖暖地嘅醋飯，簡直係黃金組合，一啖飯一啖魚腩，幸福到呢！跟住到黑門時令壽司定食，7件壽司款款都咁精緻，有拖羅、海膽、三文魚、帶子等，全部都好新鮮，魚生同飯嘅比例啱啱好。特別係嗰件海膽壽司，鮮甜到爆。見到啲魚生咁新鮮，我地就點埋海洋之心，醋飯上面有滿滿既魚子、肥美既海膽、生蠔同埋蛋，好滿足。…查看更多

嘩！之前同屋企人去咗間泰國菜館，好有驚喜啊！今次叫咗幾味招牌菜，樣樣都咁有水準。首先出場嘅就係個泰式火山排骨，呢個真係名不虛傳！個賣相已經勁吸睛，堆到高一高，好似座山咁，上面仲淋滿晒香料同湯汁，一入口，嘩！味道酸酸辣辣！排骨又燉到勁腍，一啜就骨肉分離，啲汁又索晒入去，酸辣嘅味道好過癮又唔會嗆喉，必食呀！跟住係個芋頭雞肉焗飯，呢個真係好有家嘅味道。個飯焗到金黃色，一聞就已經好香濃。芋頭同雞肉嘅份量都好足料，芋頭粉糯，雞肉又滑，個汁又做到creamy但又唔會滯。馬拉盞炒通菜都好出色，鑊氣十足！通菜炒到啱啱好，夠晒脆綠，唔會過腍。最緊要係個馬拉盞，炒得好香，帶點惹味嘅辣，唔會太油。仲有我哋叫咗兩隻燒蠔，肥美飽滿，燒到啱啱熟，保留到蠔本身嘅鮮味，新鮮到唔使點太多調味都已經好好味。最後，點少得嘆番個椰青呢！清甜解渴，冰凍嘅椰青水啱啱好可以清一清個味蕾！…查看更多

呢日同屋企人去咗尖沙咀呢間喺The One高層嘅西餐廳食dinner，喺度可以飽覽維港景色，環境非常好。三道菜嘅dinner set只要$788一位，好抵食。前菜點左日本帝王蟹蛋泡沫配24個月法國康帝芝士脆片及海膽，蟹肉鮮甜嫩滑，配埋濃郁嘅芝士香味同海膽嘅鮮美，啖啖都係幸福感！另外，甜酸伊比利亞脆豬面頰更係令人驚喜，豬面頰外脆內嫩，加埋煎到半熟嘅生蠔同荔枝嘅果香，酸甜平衡得岩岩好，層次感十足。主菜方面，黒松露北非小米配和牛牛舌及牛小排、鶏肝龍蝦汁，簡直係奢華嘅代表作，牛舌嫩滑多汁，配埋鶏肝同龍蝦汁嘅濃郁香氣，真係齒頰留香！再嚟到A5和牛臀腰肉，入口即溶嘅質感，配埋日本國產蔥同白蘿蔔蓉，清甜中帶出牛肉嘅油香，絕對係一個完美嘅配搭。最後嘅甜品香檸檬芝士蛋糕，簡直係完美句號，芝士蛋糕質感綿密，帶淡淡檸檬香氣，配埋酸柑嘅清新同楓糖漿嘅甜美，仲有糖漬檸檬皮同碧根果曲奇嘅脆口感，層次豐富，令人一試難忘。…查看更多

呢間米芝蓮推介嘅中餐廳真係非常值得推介，啱晒鐘意精緻菜式嘅朋友！首先係法式焗蟹蓋，每一啖都充滿濃郁嘅蟹香，再加埋芝士焗到啱啱好嘅金黃色，入口即化，完全係一個享受！ 跟住就係順德魚雲羹，真係好有心機，羹身滑溜，魚雲鮮甜，仲有啲淡淡嘅薑味，完美中和咗魚嘅腥味，飲落暖胃又舒服。 至於黑魚子香芒貴妃蝦球，可以話係全場焦點！蝦球炸到外脆內嫩，搭配香甜嘅芒果同黑魚子，層次感非常豐富，每一啖都係甜、鹹、鮮嘅絕妙結合，真係好有創意！ 桂花蟹肉炒銀絲亦都唔輸蝕，銀絲粉炒得好乾身，每條粉都吸晒蟹肉同桂花嘅香味，入口仲有淡淡嘅花香，食完真係回味無窮。 最後唔少得要讚下紅豆沙，甜度啱啱好，紅豆煮到非常綿滑，仲有陣陣嘅陳皮香，完美為整餐飯畫上句號！ …查看更多

呢間係中環餐廳真係不得了，食物質素一流，而且仲有好靚嘅景！我哋嗰晚試咗幾款招牌菜，每一道都令人回味無窮。韓牛他他一上枱就已經好吸引，牛肉好細緻，入口即化，配埋啲調味醬汁，簡直係極品，真係食到停唔到口。蒸蘆筍簡單得嚟又保持咗蔬菜嘅鮮甜，好健康嘅選擇。而天婦羅蝦就外脆內嫩，炸得啱啱好，完全唔覺得油膩，配埋啲醬汁真係一絕！最令我印象深刻嘅係里科塔起司釀西葫蘆花，呢道菜真係好有創意，西葫蘆花好嫩滑，配搭里科塔起司香濃但又唔會太膩，食完仲想再叫多一份。最後嘅壓軸係澳洲戰斧牛扒，真係完美收尾！牛扒熟度控制得好準確，肉質嫩滑多汁，每一啖都充滿咗牛肉嘅香味，配埋佢哋特製嘅醬汁，真係一流！…查看更多

呢日同屋企人去咗中環呢間西班牙餐廳食dinner，餐廳嘅環境好好。打開餐牌，見到好多傳統嘅西班牙菜可以選擇。首先點左西班牙辣肉腸蕃茄煮蜆，啲蜆新鮮到好似啱啱喺海度撈上嚟咁，啖啖肉，又鮮甜！個蕃茄汁酸酸甜甜咁，配埋啲辣肉腸，惹味到呢！撈埋啲汁嚟食，簡直一流！跟住係鹹蛋虎蝦忌廉意大利麵，嘩！一上枱就聞到個鹹蛋黃香！啲虎蝦大隻到呢，肉質彈牙爽口！個忌廉汁又唔會太膩，鹹蛋黃嘅鹹香同埋忌廉嘅香滑完美結合，真係食到停唔到口！個意粉又煮得啱啱好，唔會太軟，又唔會太硬，正啊！最後係炭燒加拿大天然豬鞍，真係壓軸出場！燒到啱啱熟，外皮脆卜卜，入面啲肉又 juicy 又嫩滑！咬落去啲肉汁係咁標出嚟，香到呢！啲油脂分布又平均，食落去唔會覺得太肥膩！配埋佢哋自家製嘅醬汁，更加昇華咗個味道！…查看更多

嘩！荃灣間極大瀛喜真係掂呀！佢哋荃灣店係全線第一間有分A餐、B餐㗎，揀啱個餐，食好西就話咁易啦！A餐呢，推介你一定要試吓：藍鰭吞拿魚刺身：新鮮到好似啱啱捉上嚟咁，入口即溶，啲油香係咁係個口度爆發，正！油鹽焗大頭蝦：大頭蝦大大隻，肉質彈牙到不得了，油鹽焗嘅做法，最能夠帶出蝦嘅鮮甜金銀蒜蓉粉絲蒸蟶子皇：蟶子皇大大隻又肥美，配埋金銀蒜蓉同粉絲，香到隔離枱都望過嚟！B餐就on top 再有更加多好嘢食，啱晒啲想豪一次嘅朋友：鱈魚乾海膽吞拿魚蓉taco：鱈魚乾嘅鹹香、海膽嘅鮮甜、吞拿魚蓉嘅滑嫩，全部夾埋一齊，口感層次分明，又係正到爆！油鹽焗奄仔蟹：奄仔蟹蟹膏豐腴到不得了，油鹽焗嘅做法，更加能夠帶出蟹嘅鮮甜味，正到吮晒啲手指！最正嘅係佢哋個自助區，嘢食多到眼花繚亂！但係最最最正嘅，一定要講係佢哋全港獨家嘅Nutella醬機呀！嘩，自己唧Nutella醬，想點食就點食，搽麵包、搽雪糕、甚至乎直接隊落口都得！正到冇朋友！食咗咁多好嘢，埋單兩個人都係八百幾蚊，超抵！…查看更多

呢日同朋友去咗西九M+呢間高級中餐館食dinner，我哋點咗好多好正嘅中菜。首先係松茸菊花豆腐，佢嘅刀工簡直驚為天人，可以將好軟腍嘅豆腐切成一條條，造出菊花嘅形態，加埋松露清淡嘅香氣，精緻又好味。下一道菜係蜜餞西班牙黑豚肉叉燒，啲叉燒肥瘦適中，蜜餞嘅甜味啱啱好，唔會太甜膩，咬落去仲有少少脆皮，完美。之後點左化皮金陵乳豬，個皮脆卜卜，配埋蜜桃同麵包，口感豐富！沙薑象拔蚌片真係夠爽口，沙薑嘅味道又夠濃，夠晒惹味！鮑魚福建炒飯就更加唔使講，啲飯炒得夠乾身，每啖都食到鮑魚嘅鮮味，真係好足料！黑松露百菌煲，一打開蓋就聞到陣陣黑松露嘅香味。響螺燉海參，真係落足料，啲響螺同海參都好大件，湯頭又夠晒清甜，飲完成個人都覺得好舒服！…查看更多

嘩！琴日去咗銅鑼灣嗰間餐廳食飯，真係不得了！最正嘅係佢個無敵大海景，維港夜景盡收眼底，未食嘢都已經值回票價！首先嚟咗個地中海特色小食拼盤，啲嘢好精緻，又夠晒開胃，啱晒同朋友Share。之後個香烤西班牙八爪魚腳，燒得啱啱好，外脆內軟，仲好有咬口，加埋啲香草，簡直係一流！跟住個香煎鵝肝配焦糖洋蔥吐司，真係要俾個Like！鵝肝煎得好香，入口即溶，配埋甜甜嘅焦糖洋蔥，中和返個油膩感，好正！主菜叫咗香烤原條歐洲海鱸魚，條魚好新鮮，肉質好嫩滑，而且烤得好香，食到停唔到口！另外仲試咗個大蝦墨汁意大利粉，啲蝦好大隻，又彈牙，墨魚汁夠晒濃郁，啖啖都好滋味！最後嘅甜品係朱古力新地，朱古力味好香濃，配埋啲雪糕，簡直係完美嘅Ending！呢度嘅Cocktail都好正！…查看更多

今日同朋友去咗位於ICC 101樓呢間餐廳食飯，佢嘅景色真係超靚，居高臨下咁樣望晒成日個維港。今日同朋友揀咗呢個六道菜course，每人只要$980，咁高質嘅食物同環境嚟講真係超級抵食。首先有好精美嘅小食同埋餐前麵包。跟住就係前菜，係用咗日本蕃茄配水牛芝士，食落去好Fresh。餐廳方面，我哋一位揀咗蘑菇松露湯，佢用咗一個壺加熱，然後再倒入碗度，非常特別。飲落去有好香嘅松露味，超級高質。另一位就加咗錢要龍蝦湯，新鮮龍蝦肉加上雲吞，再加埋香濃既龍蝦湯，正。下一道係慢煮鯛魚配青口，醬汁用咗牛油同檸檬汁，味道唔錯。主菜方面，我哋分別點咗日本A4宮崎和牛同埋西班牙豬腩。宮崎和牛油脂分布均勻，非常惹味。西班牙豬腩肉都好香口。最後，用一個好精緻嘅甜品作結，士多啤梨泡芙上面有鮮甜嘅芒果，配埋微酸紅桑子醬同白酒啫喱，層次豐富。仲有小巧精緻嘅甜品拼盤，真係好滿足。…查看更多

呢間蒸氣石鍋海鮮真係好正，全部食材都超級新鮮，真係好有水準。佢哋用蒸氣嘅方式煮海鮮，保持到原汁原味。我地點左尊貴海鮮套餐，每人只要$449就可以食到勁高級既海鮮！野生膏仔蟹啲膏多到，蟹肉夠嫩滑，食完真係超滿足。韓國釜山野生鰻魚，入口好彈牙，仲有種天然嘅鮮甜味，完全唔需要加任何調味。至於野生琵琶龍蝦，肉質夠彈牙又結實，一啖咬落去，隻隻肉都充滿鮮甜汁水，好滋味！ 最驚喜係佢哋嘅秘製原隻南非乾鮑，真係好入味，鮑魚厚實，而且煮得啱啱好，食落有咬口。大西洋野生青口啲肉嫩滑又冇腥味，配埋佢哋嘅蒸氣粥底吸埋啲鮮味，真係一流！另外，加拿大野生海虎蝦啲蝦肉又彈又甜，啖啖鮮味。韓國釜山蠔就肥美又鮮嫩。最後，黃金翡翠螺啲螺肉爽口彈牙，食完仲想再叫多幾碟。呢度每樣海鮮都好高質，食晒海鮮之後再食粥，粥底吸哂啲海鮮精華，超正！…查看更多

呢間喺元朗台式小食真係好正，食物款式多，味道又夠地道！ 香腸滷肉飯香噴噴，滷肉肥瘦適中，醬汁鹹香十足，拌埋白飯一啖啖咁食，完全停唔到口。再加埋台式香腸，甜甜地帶啲煙燻味，口感彈牙，好惹味！ 雜錦湯麵湯底清甜，麵條煮得啱啱好，彈牙又入味。配料方面，花枝丸、貢丸、甜不辣同蝦卷啲質感唔同，但全部都鮮味十足，仲有台灣街頭小食嘅懷舊感覺，感覺好似返到台灣咁樣！ 甜品方面，仙草芋圓真係無得輸，三色芋圓煙韌又香芋味，蜜紅豆甜而不膩，水晶啲口感滑溜溜，配埋清涼嘅仙草凍，解暑一流。 最後要特別讚嘅係芋泥肉鬆蛋餅，呢個組合真係好食，芋泥香滑綿密，帶啲淡淡嘅甜味，配埋鹹香嘅肉鬆同香口嘅蛋餅皮，層次感爆棚！ …查看更多

呢日同屋企人去左荃灣呢間新開嘅極·大瀛喜食放題，係全線首間推出A餐同B餐嘅店，滿足唔同口味需求！藍鰭吞拿魚刺身好肥美。櫻桃鵝肝香滑濃郁。鱈魚乾蟹肉蟹粉Taco外脆內嫩，而北京烤鴨伴荷葉包將中日元素完美結合。其他招牌菜式仲有油鹽焗大頭蝦、草莓戀人咕嚕肉、金湯花膠蟹黃翅等，每款都係高級享受。B餐嘅菜式更加高端，火炙A5和牛伴海膽，油香濃郁，極致味覺享受；仲有拖羅、油鹽焗奄仔蟹同鱈魚乾海膽吞拿魚蓉Taco，每款都係頂級之選。仲有全港獨家嘅Nutella醬機設喺自助區，任你攞嚟配甜品或者直接食，甜品控一定唔可以錯過！仲有任食嘅Häagen-Dazs，一定回本啊。燒菠蘿又大又甜。超級滿足！…查看更多