講到呢度，一定要提吓佢哋隻貓 BB 店長——「刀仔」！真係超！級！可！愛！隻貓仔好鍾意黐住人，你一坐低佢可能就會行過嚟撩你玩，完全俾佢嘅魅力溶化咗！淨係為咗隻貓都值得嚟一次！[1]
介紹完包店長，講返啲 burger 先。呢度嘅 burger 全部都係即叫即整，保證新鮮熱辣辣！
Menu 選擇多元化
佢哋有幾款特色 burger，好似「焦脆雞堡」同「升級焦脆雞堡」都係用無激素雞扒，每日限量供應㗎！另外仲有「黃金鰈魚堡」，用嘅係比目魚扒，一樣係限量版。所以想食就要早啲嚟喇！
套餐配搭都好自由：
加 $28 有薯條同飲品
加 $38 有任何一款小食同埋飲品
加 $78 就有任何一款小食加啤酒（啤酒怪福音！）
burger 仲可以追加配料，芝士、煎蛋、煙肉，鍾意點砌就點砌！
我哋叫咗乜？
今次我同老公就叫咗個「升級焦脆漢堡」，同埋一個每日限量嘅「焦脆雞堡」。小食我哋要咗「黃金炸魚條」，同埋「甜香番薯條」。
食後感：高質！
升級焦脆漢堡： 呢個 burger 用上安格斯漢堡扒。佢哋嘅漢堡扒係薄身設計，所以口感比較香脆，邊位仲有少少焦香。雖然薄身，但係絕對唔會乾，仲好有肉汁！芝士味道香濃，配搭秘製醬汁同埋有機菜，食落好清新，中和返油膩感。最最最緊要係個麵包，烘得好香脆，好有誠意！
焦脆雞堡： 雞扒用咗無激素雞扒，肉汁好多，口感超級嫩滑！一樣有香濃芝士同秘製醬汁，加埋有機菜，好清新唔油膩。麵包都係烘過，一樣咁香脆！
小食：
黃金炸魚條： 呢個炸魚條真係同平時食開嗰啲好唔同！食落去外脆內里口感彈牙，唔係嗰啲粉粉哋嘅魚肉嚟㗎。真係越食越想食，好想 encore！嗰種彈牙口感，一定要你親身落嚟試過先知有幾好食！
甜香番薯條： 外面炸得好脆，又唔油膩，而且甜番薯味好濃郁，超食！
總結
總括嚟講，Power Burger 絕對係一間有特色、食物高質素嘅小店。有可愛貓店長陪食，食物又即叫即整好有水準。如果你係 burger 控又鍾意小動物，一定要嚟深水埗試吓！地址係黃竹街 2k 號舖呀！
