舖頭由日本人主理，一入去就有種置身日本街頭小店嘅感覺，師傅煮麵嘅專注神情令人好有信心。我哋兩個人叫咗兩款招牌拉麵同小食。
🍜 白雞鹽味拉麵
朋友想食清爽啲但又要夠味，呢款白雞鹽味就最啱。湯底係熬到奶白色嘅雞白湯，入口非常綿密 Creamy，充滿膠質感但完全唔會覺得油膩。鹽味調較得啱啱好，吊出咗雞湯嘅鮮甜味。
配料方面，慢煮雞叉燒做得好出色，嫩滑多汁，完全唔會鞋口。
🍜 牛筋 Black 拉麵
我就係重口味代表，揀咗佢哋好出名嘅 Black 拉麵，仲要係牛筋版！湯底係極濃厚嘅黑蒜油豚骨湯，一上枱嗰陣黑蒜嘅焦香味撲鼻而來，飲落去好甘香，層次感好豐富。最驚喜係個牛筋！炆得超級入味，軟腍得嚟仲保持到少少 Q 彈口感，每一啖都係骨膠原，配埋掛湯力強嘅拉麵同黑蒜湯一齊食，真係好滿足。
🥟 餃子
拉麵店嘅靈魂伴侶。黑龍嘅餃子煎得個底金黃酥脆，皮薄餡靚。咬開有肉汁，唔係嗰種乾爭爭嘅貨色，點少少醋同辣油，好解膩。
🐙章魚丸
即叫即整，熱辣辣上枱。外皮微脆，內裡軟綿綿，最重要係真材實料，食到有一粒粒章魚肉，配埋大量木魚絲同沙律醬，味道好正宗，唔係一般街邊貨色可比。
食完終於明白點解黑龍可以喺灣仔屹立十年。由湯底到配料都食得出日本人嗰種一絲不苟嘅精神。
