豊勝手丼 (已結業)

係啊，無錯，今晚又泥登龍街搵食。事關登龍街真係有唔少幾唔錯既餐廳，要試晒都唔係咁易。今晚泥到呢間『豐勝手丼』試下啲『家鄉菜』。一入到去，鋪面唔算大，目測可容納二十幾人左右。但裝修擺設都唔錯，反而鋪面細細地又多番啲日本小店既人情味既感覺。一坐低就有職員上茶比menu，而職員既服務態度都幾唔錯。我同老婆二話不說，即刻揀左兩個丼飯：『海鮮五色丼』& 『海之幸丼』(我揀左後者)，然後點左4款壽司，包括：赤蝦，油甘魚，三文魚同呑拿魚。另外，仲叫多左個小食『日式炸豆腐』添。無幾耐，小食先上枱。估唔到呢個『日式炸豆腐』竟然會有驚喜。因為佢口感完全唔似平時食到既炸豆腐。如果要形容，有啲似食緊墨魚滑。加埋個醬油調味，真係唔錯。跟住就到壽司上枱。食落都算係幾新鮮。而且佢壽司飯唔係用普通珍珠米。我上網check過，果啲啡啡地色既飯應該係江户前赤醋飯。味道比普通壽司飯更有層次感。食完壽司，主角正式上場。我點既呢個『海之幸丼』，有油甘魚，拖羅，海膽，雪蟹鉗，赤海蝦，比目魚，魚生種類非常豐富，而且每一種都各有鮮味，一碗丼飯食到幾個層次，真係無乜可以彈既地方。最後仲叫埋支信州蘋果梳打，大滿足！