魚蛋哥

营业中

休息中

今次出旺角同朋友聚聚，特別去咗魚蛋哥試下港式小食同埋車仔麵。我哋點咗咖哩三寶，入面有咖哩豬皮、魚蛋、同埋魷魚。另外叫咗一碗柴魚花生粥、混醬腸粉、燒賣、同埋一碗車仔麵，車仔麵揀左出前一丁，四款餸包括雲吞、墨魚丸、牛柏葉、同埋魷魚，飲品就叫咗熱豆漿同埋凍檸樂。咖哩三寶每樣都好好味，因為個咖哩汁真係好出色，魚蛋彈牙，豬皮夠爽，魷魚亦都好有鮮味。柴魚花生粥入面好多料，而且食完個胃暖粒粒，鍾意食粥嘅朋友一定要叫。混醬腸粉同埋燒賣就係港式小食嘅代表，所以一定要叫同埋個質素都好高，個腸粉好滑，加埋甜醬同埋麻醬食真係冇得輸，燒賣就一貫高水準。車仔麵其實有超多餸畀人揀，我都睇咗好耐就揀咗4個餸，因為本身鍾意食牛栢葉及魷魚所以一定會叫，雲吞好有蝦味，墨魚丸就非常彈牙。呢餐食到好滿足而且價錢貼地，鍾意食港式小食嘅朋友一定要去魚蛋哥。