魚蛋哥

一入去已經有位，唔洗等。始終係鬧市，環境相對地都比較嘈。到落單個陣，我地填咗張車仔麵紙，仲想另外叫啲野食。阿姐一野拎咗張紙就想走咗去😂無理我地仲要唔要其他野，要叫佢返返黎。見到另一個人（類似老闆娘）打單。整體服務個feel伏伏地，所以我地之後有即刻對單，真係落漏咗個野飲（本身用紙仔剔咗一個凍咖啡一個熱豆漿）。但算啦，都係一陣出去叫其他野飲算。蠔皇冬菇清甜蘿蔔咖哩汁河粉 $31食物黎到都中規中矩。河粉係我想食個種，又軟又薄。蘿蔔唔苦但亦唔甜，普通烚熟咗咁。冬菇幾有味，係由乾冬菇浸發出黎醃過。個咖哩汁都惹味，湯底溝稀咗就唔算好濃。無其他咩韭菜芽菜嘅配菜。總括黎講清清地。皇牌咖喱魚蛋6粒 $10 + 混醬腸粉8條 $32咖喱魚蛋確係好食，彈牙有咬口。重點個汁夠入味，少少辣但唔太食辣嘅人都覺得食得到。混醬腸粉啲醬非常足夠滑捋捋叫車仔麵可半價叫野飲 凍香濃咖啡 $9呢杯夠凍，但對我黎講太甜啦呢間野嘅賣點就係比較抵，地點算方便，朗豪坊後面過條馬路就係。…查看更多

是但求其食，周街行就行到嚟呢間小食麵店，平時嘅街頭小食到潮州粉麵都有，價錢唔貴糯米飯唔係大家平時食開果種，有少少新奇，花生、蔥、蝦米碎、菜脯，最後淋上豉油，味道OK混醬腸粉4條OK啦，佢腸粉質素算高，到爽彈少少更好，醬汁好足夠雲吞麵4大粒，粒粒都有蝦肉，好爽好食…查看更多

每項1分都比多你 如果有負分揀 我負爆你地🙄平時好少打食評，呢間魚蛋哥買過幾次早餐，次次都係咁嘅問題，真係忍唔住上嚟比個差評佢🤬每次買腸粉早餐，已經提前同落單店員講「少豉油、少甜醬、多麻醬」，以往幾次就算落單講左，都睇到整腸粉果位呀姐係完全唔睇客人要求，一式一樣機械人咁落醬，今次唔知第幾次專登佢整嘅時候企喺佢前面講多次：我要少豉油多麻醬（驚老人家無記性 我都費事講多一個少甜醬）點知呀姐對耳仔好似閂埋左咁 佢有佢做 你有你講，由於我買嘅係燒賣腸粉，呀姐剪完啲腸粉落左一羹豉油、甜醬麻醬，跟住夾完燒賣 佢竟然再補多羹豉油😡，我即刻叫住佢：我要少豉油喎！佢都係無理我，我再講多次多麻醬，佢就態度好差咁話：落一羹比你好多㗎啦！心諗乜你都知一羹多，你仲落兩羹豉油比我？🙄啲麻醬又稀到水咁，一啲麻醬味都無，啲豉油多到浸水咁，職員態度又差 ，真係唔會再幫襯😡…查看更多

女職員定唔知老闆娘態度惡劣，經常同男顧客傾偈唔做野。早餐買腸粉想加杯凍飲，問佢加幾錢又答唔出，但就自己同我篤機收錢。最後仲要好攪笑話唔小心剪多左腸份比我，要收貴d🙄 如果佢好禮貌，平時既我一定冇所謂，但佢態度咁差，我即刻同佢講：「咁你幫我拎返出黎，我唔會加錢。」買個早餐都要受氣，寧願唔食👎🏻同埋店入面既人從來唔會講「歡迎」「多謝」「BYEBYE」，如果你地食個早餐都想受氣既，一定要去旺角魚蛋佬☺️…查看更多

有日喺度食早餐，叫左個餐食同叫左杯熱豆漿飲。點知飲飲下先發現杯邊度有紅色唇膏印💄！！我用紙巾輕輕抹就抹得甩，好明顯就係冇洗杯！！我同個女職員投訴，但佢完全係愛理不理既態度，乜都冇做😤最少都可以say 個sorry唔好意思，幫我即刻換個杯掛？但完全冇！！如果唔係因為趕住返工要走，我真係會投訴落去🤯食物又難食自此以後，我都冇再幫襯過！就算佢地點幾方便都好，但呢間野衛生惡劣，員工態度差，食物質素差，千祈唔好幫襯🤮…查看更多

我尋晚收咗工同男朋友去食左依間野度食，D員工好似趕住投胎咁，未講完就咁走左去，埋單的時候我只係有兩個5毫子，佢地都話唔收，但又無寫明唔收，我咪話5毫子唔係係錢，收錢個面即刻黑晒，我地走左，我見佢唔知同其他人講我哋咩，依間野，絕無下次再幫襯…查看更多

叫咗外賣自取，一路食一路搵到蟲，毛，鋼絲刷碎😅衛生超級惡劣，大家睇圖都見到！講真如果淨係得一條毛嘅話嘅話我都唔會打呢篇野，但係係連續搵到幾樣污糟野😅🤮令人作嘔，同埋味道好淡😅唔好食都唔緊要，但係咁多污糟野真係接受唔到😅平時冇食開，諗住係附近試吓食車仔麵，點知咁離譜😅一定唔會再食呢間！本來見到openrice啲差評都係講緊服務態度唔好，我諗住只要好食都冇問題啦，但污糟到咁，寧願曬啲時間打呢個食評都要講比大家知唔好中伏😅 …查看更多

平時間中傾閑偈慢動作都人之常情不分前後食物質素不一真係好嬲今次，年紀最大收銀女人 仲要無視人講野、比人打尖老闆唔該睇下CCTV 如果事關者係老闆，我都無言以對不分先後理直氣壯，正正因為你助長歪風 叻食物質素比中期好左好多，食物改善到，但職員都係改變唔到，如果並非員工真係好大參差 唔知情況下能理解，知情下，同職員講左2次 職員都能夠做到 不分是非黑白如果只做 同地方人生意或者同地方人優先咪講到明囉 趕住翻工 諗住快餐 ～真係唔洗幫襯…查看更多

我好少寫食評，今次真係覺得食到一肚氣，我一同4人去食野，每人都至少有最低消費，首先落單既女員工態度好差，叫佢落單佢就一落執枱一路回應：講啦，食咩呀，到食物黎到時，叫佢拎杯佢話：無呀，我至少都幫襯左好多次，之前未咁多人時都無咁差，依家多人少少就咁既態度，前一次幫襯外賣又找少左錢比我，一句唔好意思都無，入面職員話生意好左，但你地咁既態度，我相信大家食客都感受到，我自己覺得好食，但食野受氣我就永遠唔會再幫襯…查看更多

我知而家自由行多咗，我知佢地鋪細，但都唔使態度咁差。我一行4人，已經係1人去搵位，其他三人係門口等位，等咗5分鐘左右有位，我地叫嘢食。我地叫左12件煎釀三寶, 1個公仔麵餐（有1杯飲品），再加1碗粉麵。食物到齊，問員工攞二個碗，佢已經黑面唔想俾咁，飲唔到，問佢攞隻杯，員工竟然話唔俾。我地4雖然唔係食好貴，但寫明最低消費每人$20，我地過晒啦⋯⋯又唔係自己帶飲品，係套餐包架，攞個杯都唔俾。好過份囉😡…查看更多

放工好肚餓,朋友又未到,偷偷地叫左份厚切煎釀三寶同炸雞翼~煎釀三寶比平時厚少少,魚肉唔算好多,唔夠熱。炸雞翼唔係好脆但幾入味,食完有啲油膩。價錢唔算好貴,都ok嘅🤔…查看更多

我好少寫食評特登開返個account講佢哋有個高+大隻嘅女員工，隻眼好似割過雙眼皮嘅，每朝買早餐態度都勁差做街坊小店，唔係要你態度好好，但係都唔係每朝都搵人嚟鬧，或者搵人你啤，或者搵人嚟出氣上次等緊外賣，有個菲傭姐姐嚟買，佢係咁指住佢嚟鬧，話寫咗囉，咪$2X囉。唔該比返少少尊重…查看更多

今日為食蟲作動，於是畀個機會呢間上次中伏嘅食店，叫嘅當然唔係上次嘅魚肉碗仔翅以三樣啦！而係魚肉燒賣，以及蘿蔔魚蛋豬皮，呢次無中伏，仲好好食添。魚肉燒賣，賣相唔掂，咬落有啲硬，但勝在有魚味。蘿蔔魚蛋豬皮，魚蛋有辣同唔辣可以選擇，我揀咗辣嘅，佢唔係陳皮魚蛋，只係普通嘅魚蛋，以一個唔食得辣嘅人嚟講，佢辣度好夠，但同街市買嘅魚蛋一樣，唔好諗住會有魚味，得個爽同彈牙。豬皮厚身爽口夠味道，佢唔係用雜貨舖買到嘅油泡豬皮，而且有用調味料燜煮過，唔係好似有啲舖頭咁白烚。蘿蔔，呢個係最正，清甜無渣，超好食。合共$38，呢個價錢起旺角亞皆老街，近朗豪坊，算係合理。…查看更多

今日出旺角辦完事，正值午餐時份，天口熱，唔行咁遠，嚟到呢間舖，反正未試過，就試下啦！呢度地方唔大，坐位逼仄，但勝在近地鐵站。叫咗兩款我讀書年代嘅車仔檔小食：韭菜豬紅腸（三樣）及魚肉碗仔翅，一共$56。三樣唔單只份量少，更重要係啲豬腸係滷水，唔係白烚，完全失真，佢哋究竟知唔知傳統嘅三樣係點做？還是要就埋車仔麵，所以只做滷水一款？咁做法啲豬腸係唔好食㗎！魚肉碗仔翅啲魚肉，好似通達咁切到一粒粒，而唔係傳統咁用筷子彈落水度淥熟，又係虛有其名嘅失敗之作，完全失望！後記：兩款小食當然食唔飽，我要到附近賣多個包先至夠。…查看更多

夜晚九點幾去買嘢食，企喺收銀機嗰個男人同枱內地遊客落緊單，我企喺度等佢落完單先，個男人問我食乜，講左兩次佢都記唔到，我再講多一次佢就好忟咁話佢知，講嘢講到一舊舊，望人又眼超超，暫時都唔再幫襯。…查看更多