興記豬什專門店

一向都唔係一個好鍾意食內臟嘅人，成日都覺得好似有陣怪味，但嚟到位於長沙灣嘅興記豬什專門店，就改寫咗我對內臟嘅固有偏見。興記豬什專門店每日都會到屠房挑選豬什嘅貨源，確保食材新鮮之餘，仲會挑選冷門嘅部位，非常刁鑽，而且經過大廚嘅調味，將唔同嘅內臟發揮至最適合嘅味道同口感，原來食內臟真係唔洗畀啲掙扎！

足料豬什皇
唔識揀？就一於興記豬什專門店嘅足料豬什皇，有齊晒11款精挑細選嘅豬什，包括黃喉、豬心同豬肺等。黃喉口感爽脆並略帶胡椒湯嘅辛辣味；豬心有口感之外仲帶有一份滑嫩；豬肺則外層略帶彈性但口感軟腍。最重要當然係唔會有內臟嘅臊味，完全改觀呢！

頂級黃沙潤配蝴蝶腩
黃沙潤可以話係豬什嘅王者，大大塊嘅黃沙潤爽滑而帶點粉潤，口感一流！至於同樣係興記豬什專門必食嘅蝴蝶腩，肉質入味又軟滑，真係食過返尋味。

冰鎮豬生腸
珠圓玉潤嘅生腸排列得整整齊齊，冰鎮過之後令生腸更Q彈，建議點上芥末豉油，令新鮮嘅生腸喺爽彈之中添上清新嘅刺激感，絕對係將唔同嘅內臟發揮至最適合嘅味道。