大榕樹下

揸車過嚟真係方便，泊車又就腳，所以專登入青衣城食飯～講真我都好耐冇嚟過，個商場都變咗啲樣。今次試咗朋友推介嘅「大榕樹下」，整體嚟講不過不失啦！

水晶雞半隻係幾滑嘅，不過真係冇咩肉食，啖啖骨咁囉。花肉啫豆角夠晒鑊氣，但係真係油咗少少，食多兩啖要飲茶涮一涮。黃豆苦瓜燉龍骨幾清潤，苦瓜唔算太苦，可以一試。煲仔飯就正常發揮，臘味都香嘅。

最好味反而係個銀魚仔蒸絲瓜，清清地又鮮甜！仲有個豬油渣炒菜心夠爽嫩，食落去香口惹味。最後嗌咗馬拉糕同雙皮奶作結，馬拉糕鬆軟唔會太甜，雙皮奶都算滑。

整體嚟講係可以一餐嘅，不過未必會特登嚟食。如果喺附近行開街又唔知食咩，可以試吓！

1

20

10

4