今次朋友介紹呢間私房菜，CP值超高~價錢around $430-560左右，價錢合理，今次我地就揀左個$480 嘅set~
一睇Menu，已經好期待！全部都係d功夫菜，好多仲係出面無咩機會食得返嘅菜式！
螺絲青瓜
前菜有三道，以清新嘅青瓜打頭陣，螺絲嘅賣相一上枱已經勁吸晴，我一路諗，係唔係麵包黎嘅呢？食落去先知係青瓜，加上淡淡嘅醬汁，咸得黎又好清新，一面食，一面研究佢嘅刀法，究竟係點切嘅呢?
香酥脆絲
一上枱就嘩嘩聲~靚到成幅畫咁！我本來以為係碟上面嘅花紋，點知原來係主廚自己畫上去....好癲丫！
靚畫下面鋪左d炸葉同肉鬆係面，加上少少芝麻，成個畫面都好靚！
食落去先夠驚喜，我本來以為個d炸葉係平時食開嘅炸紫蘇葉，但係冇個種油膩感，亦都冇紫蘇葉個種獨有嘅嗆鼻味，於是就問師傅係點整，原來.....原來係菜心.....下.....完全冇諗過菜心可以咁做法！平民嘅食材，加上巧手嘅功夫，原來可以變得咁巧奪天工！
避風塘粟米
避風塘乜乜乜就食得多，但係避風塘粟米又真係第一次，佢嘅粟米用左大大隻嘅甜粟米，一入口會有避風塘嘅香口辣味，然後有甜味結尾，因為炒嘅時候，令粟米收左水，令甜味更出，中和返本身嘅香辣！
龍皇杏汁豬肺湯
豬肺湯又係一個好多工序嘅菜式，淨係洗豬肺都洗死，要飲到一碗足料嘅豬肺湯，真係買少見少！呢個湯一飲就feel到廚師嘅心機，係老火湯嘅味道！豬肺、瘦肉、雞腳煲得好夠火喉，濃而不燥，再加上龍皇杏所餚出黎嘅杏汁，香而不嗆，就算我呢個唔好杏仁嘅我，都飲得津津有味！
懷舊富貴金錢雞
黎到主菜，呢個金錢雞真係不得之了！我相信呢一代人唔係好多個食過，原來係好耐好耐之前，佢只係一個平民美食，但因為工序多，賺又賺唔多，已經無咩餐廳會整。用料其實好平民，就只係用雞膶、瘦肉同豬膏，梅花間竹咁串起黎，再以麥芽糖燒成，要用簡單食材變成人間美食，廚師嘅手藝就更加重要！雖則話係肥膏，但係一d都唔覺肥膩，反而係爽口香甜，加上燒香左嘅雞膶惹味都極點！怕"溜"嘅話，可以夾埋個乂包，油脂滲入包裡面，吸收曬所有精華，一d都唔浪費！
冰窖咕嚕肉
又一道要尖叫嘅菜式~冰鎮咕嚕肉有食過，但係成個冰窖咁上，就真係幾搶眼！生鮮炸出黎嘅咕嚕肉，即刻放入冰窖裡面，令到外表形成一陣脆糖，外脆內軟，酸甜醒胃又消暑！食嘅時候要留意，千祈唔好顧住影相，淋左就唔好食嫁啦！
江南百花雞
唔好睇佢表面係一隻雞，雞皮底下嘅其實係蝦膠！又係一道神菜！首先要起成塊雞皮出黎，然後將蝦膠釀係雞皮裡面，蒸熟之後再切件，最後加玻璃芡，令上枱嘅時候似返隻雞！
坦白講，我呢個小資女真係未食過，什至未聽過呢道餸，聽完煮法之後，我真係甘拜下風！味道好特別，因為有雞皮，所以有雞嘅香味，蝦膠打得好彈牙，食落嘅口感啖啖肉咁，又有蝦嘅鮮，I can't find a right word！
四川酸菜魚
雖然呢個酸菜魚舖滿辣椒，但係我呢個唔算食得辣嘅人黎講，都唔會覺得頂唔順，而且愈食愈想食，全因為佢嘅魚肉做得好滑，辣得好香口，好惹味，唔會太麻，搞到冇曬味覺咁，鍾意辣嘅話，食埋底層嘅薯粉，精華所在！
甜蜜燒排骨
外面嘅蜜糖燒到脆脆地，裡面嘅排骨軟淋淋，肉汁充份鎖住係肉裡面，食到無儀態都要食
生炒薑汁芥蘭
雖然只係一碟菜，但係主廚都好認真咁對待，碟邊嘅畫完全令我覺得佢係一個畫家~
薑汁芥蘭睇落好似冇咩特別，不過好驅寒暖胃，食完即刻暖暖的~
街頭腊味東北糯米飯
主廚話，呢道糯米飯係佢係個時候，街邊好常見嘅街頭小食，以前就係用一個紙袋，裝住d糯米飯咁賣，食嘅時候加少少熱辣辣嘅甜豉油，同少少蔥花，暖笠笠，冬天恩物，聽佢講故事，都feel到老香港嘅環境
冰花鳳凰球
好香丫~~~一上枱個個都流曬口水，好香嘅蛋味，佢唔同平時食嘅沙翁，蛋嘅香味比沙翁多幾倍，熱辣辣又鬆軟嘅蛋球，再加上鋪滿面嘅砂糖，甜與鹹嘅混合，洽到好處~為呢餐完滿畫上個句號。
鋪頭位置唔算大，但係都夠2圍枱，要食就一定要book位啦！
丫~唔可以唔提下佢地嘅酸菜，係主廚自家醃制，可以一樽樽咁賣，我地成枱人，大半數都一人賣一樽走，可想而知係幾好食啦！
