盛記粥麵

营业中

休息中

本身約咗朋友食tea, 不過遲左，變左4點尾5點頭，tea 又tea 唔哂，晚飯又好似太早，咁啱有間粥粉麵店，原來係之前幫襯過，覺得唔錯嘅，今次一於試試睇下有冇退步。每人都係叫一個餐，一齊share。一個餐包括咗主食，小食加杯嘢飲，都幾豐富。柱候牛腩湯麵（粗麵）牛腩厚大，大大件好有口感，份量好足，牛腩入味。個湯底好濃，連同爽滑掛汁嘅粗麵一齊食，好滿足。炸倆油炸鬼炸得好脆，腸粉皮好薄包住，加埋自己親自唧上去的甜醬麻醬，當然好味非常。黃沙豬潤粥粥底好綿，味道好鮮甜，豬潤大約有五大件。處理得好得宜，沒有內臟的腥臭味道。豬潤厚切，一咬落去爽脆，細嚼下好粉嫩，有溶化感覺，連同薑絲一齊食，好好味。湯雲吞一碗5粒，皮簿餡靚，原隻鮮蝦連豬肉入口爽口，唔會太細粒，作為小食很不錯。熱豆漿豆味濃厚，都幾香滑，不錯，值得讚嘅係杯豆漿真係好夠熱。凍招牌薏米水勁多薏米，好重薑味，飲落好好味又健康。建議支飲管可以改用珍珠奶茶嗰隻粗飲管，因為普通飲管俾啲薏米塞住晒。整體都好滿意，既可做下午茶, 又可做正餐，啱啱適合我哋今晚呢個時間，係好好嘅配搭。