豉椒炒蟶子（單點$180），有8隻蟶子，蟶子好大隻，近乎係蟶子皇級數，肉質肥美、爽口，食落好新鮮，表面掛滿豉汁，食落好惹味，配料包括有豉椒、辣椒、紫洋蔥、彩椒、蒜頭、香蔥。
黃金蝦球（單點$128），即叫即炸，食落好熱辣辣，表面鋪滿鹹蛋黃，味道鹹香，炸漿口感薄脆，鮮蝦肉質彈牙，味道鮮甜，整體皮薄餡靚。
胡椒豬肚浸花甲（單點$118），豬肚份量多，口感厚彈，花甲肉質飽滿，食落鮮味十足，湯底飲落充滿白胡椒味道，但又不會太濃烈、帶點豬骨味道，配料包括有鹹酸菜、辣椒、蒜頭。
椒鹽鮮魷（單點$108），表面鋪滿椒鹽、蒜蓉，蒜蓉經過爆香之後，食落脆卜卜，如果有落埋指天椒，應該會更加好味，炸漿口感酥脆，鮮魷肉質爽脆、不韌，食落好香口，配以喼汁食用，味道更佳。
吹啤啤傾城手工啤（單點$45），ABV 7.2%，麥芽、小麥味道比較濃厚，蓋過百香果味道，所以入口較苦。
吹啤啤單眼佬手工啤（單點$45），ABV 4%，話梅、蜂蜜味道融合，飲落味道酸甜、帶點微鹹，容易入口。
1
