1
1
臭屁熊揀左花膠美人雞湯，店員上鍋就叫我地試下飲下個湯，好黃，又真係幾清甜，有啲似雞湯米線舖啲雞湯，冇乜味精味。飲完湯店員就幫我地落左1/4隻雞同2片花膠落去，啲切雞件冇雪味，肉質都算滑，唔錯
之後我同臭屁熊就開始吃貨模式，專攻手切肥牛件！啲肥牛部份都分得好仔細，有匙柄、五花趾、吊龍伴、牛朴肉，仲送左碟雪花肥牛。如果要排個順序，我同臭屁熊first pick都係雪花牛同匙柄，食落去肥瘦比例適中，仲好有牛味，估唔到300幾蚊嘅套餐食到呢種質素嘅牛，整體而言，呢間舖啲牛肉質素好好！大推！
另外仲有一大盤海鮮拼盤，店員上菜嘅時候，啲蝦嘅腳仔仲識郁，好新鮮。而且店舖用竹籤拮住啲蝦，要剝殼超級方便，肌肉熊平時懶得落手剝蝦，都可以輕鬆用筷子搞掂！ 鮑魚、扇貝同蜆都好大粒，好有口感！
配料方面，呢間舖都有細心位，啲蔬菜全部有保鮮紙包住，好衛生，唔怕整污糟。啲魚腐、台灣腸、手工丸、烏冬質素都幾好，仲好過大型連鎖米線店嘅配料
野飲方面都有特別，有一揸揸嘅竹蓆茅根、水果茶，仲有常見嘅大路野飲，都算多選擇
最後甜品有哈根大師雪糕，有四隻味揀，雲呢拿、朱古力、士多啤梨、曲奇
_
🍽味道指數:★★★★★
📷環境指數:★★★★☆
🛎服務指數:★★★★★
💰抵食指數:★★★★★
😋推薦指數:★★★★★
📍淥鼎記
