小鍋米線

营业中

休息中

小鍋米線一直都係元朗嘅臥虎藏龍食肆。 招牌米線有成六七種咁多， 全部都以四川,雲南地方命名。個人認為小鍋米線優勝之處， 係湯底冇咁多味精， 亦冇咁油膩， 配菜亦相當豐富。今次所選擇嘅係玉龍米線（ 大辣）， 其實如果唔睇餐牌， 係唔會知道各個米線嘅分別。 由於個人口味唔鍾意食荀， 所以就揀咗呢個冇荀嘅玉龍米線。 呢個米線材料非常健康， 蔬菜類別有芽菜、韭菜、灰樹菇、同木耳， 相比起坊間嘅米線， 健康得多。 而且小鍋米線嘅炸醬同埋甜酸菜都非常之出色， 炸醬酸辣， 肥肉唔太多， 甜酸菜以甜為主， 配襯埋鹹酸嘅湯底，非常出色。 今次仲加咗4蚊叫咗菜肉餃， 估唔到有四隻之多， 餡料足秤， 非常超值。 雖然一碗米線要40幾蚊， 但就非常之飽。有機會嘅話， 一定要試曬咁多款米線， 揀一款至愛。