高高酒家

营业中

休息中

專登出去為老爸慶祝食生日飯，佢哋第一次食，當然要食可以解放雙手嘅避風塘瀨尿蝦肉啦，重麵包糠嘅避風塘，但欠奉豆豉，少咗嗰種香味，都有6隻蝦肉，夠大隻，啖啖肉，加配一支藍妹啤酒，套餐價$318，少貴，但值得一試。冰川無骨咕嚕肉，冰住上，令肉外層嘅醬汁部分脆卜卜，甜酸均勻，充滿口感之餘又開胃，但係啲配菜料太碎，夾唔到嚟食。豉油王鵝腸，鵝腸爽脆，豉油唔會死鹹，加上芽菜墊底，好清爽。杞棗豬膶浸時蔬，可惜無其他菜揀，只有白菜仔，豬膶略嫌唔夠滑，多薑絲僻豬膶腥味，有片片紅棗甜味，都幾好味。高高小炒王，碟頭大，有炸脆嘅芋頭絲(坊間好少有)、銀魚仔、腰果、菜葡、大隻蝦乾，非常惹味，餸飯或佐酒都好適合。