壹蒸鍋

营业中

休息中

食日式放題食得多，蒸汽鍋加火鍋放題加粥底火鍋真係第一次試。我地一行四人order左刺身海鮮蒸鍋。每人一客海鮮拼盤，刺身就任叫任食。首先黎一盤刺身熱個身先！有我最愛既甜蝦，夠大條，唔係行貨喎。三文魚薄薄地不過都夠新鮮。呢個價錢仲有刺身任食真係幾抵。重點既海鮮拼盤，用層層疊蒸盤去蒸，底下係預先叫左既魚湯粥底。蒸十分鐘就可以喇。有專人幫你效好時間，計時器一響就食得喇！海鮮比我地預想既有誠意，有龍蝦、蟶子、帶子、扇貝、蠔、鮮魚同鮑魚。每一款都淡淡肉，算係幾新鮮架。龍蝦鉗拆出黎大大舊肉，好滿足。食晒成個海鮮盤唔好講笑，已經飽左七成。繼續叫佢啲任食火鍋食下先！重點出擊，叫左最愛既芝士腸、墨魚滑、牛柏葉、同好多唔同款既菜。將佢地放晒落粥底度煮。煮完之後最後衝剌喇，個湯底好鮮味！有晒頭先蒸海鮮既精華。如果大家覺得有腥味，建議放餐廳提供既蔥一齊落去煮，即刻無晒腥味。每人二百幾蚊有任食海鮮火鍋放題，仲有刺身任叫，野飲任飲，都咪話唔抵喇掛。