在一些女校 secrets 的群組內，女生們都會作出很多結論，說拍拖就應該同某男校男生，而結婚就應該同某男校的男生。的而且確，不同男校的男生住住有不同的特點及氣質，而這夜，我看到我身邊的這個華仁仔，很享受的在皇仁仔飯堂內大吃大渴。
2
第一道菜係蚌仁花姿乳鴿甫，色彩鮮艷，用上青紅椒、子薑做配菜，而主角當然係乳鴿片，再加埋桂花膀同象拔蚌，齋睇陣容都知好味。特別要讚係乳鴿片非常嫩滑入味，當做的子薑幼嫩無渣，正。
接着係蟹粉豆腐，始終不是食蟹季節，但整體俾我想像中出色，豆腐滑溜，蟹粉亦算鮮味，唔錯。
到我最期待的佛跳牆出場，原盅上枱，體型非常龐大，侍應慢慢將燉湯個蓋揭開，一揭盅，全枱人起哄，三大寸總共13隻鮑魚放在面，非常壯觀。跟住侍應將湯料逐一夾出，包括：一大隻雞，厚身冬菇，大量粗身魚翅，原隻火瞳，肥美豬軟骨等，淨係夾湯料都夾左好幾分鐘，份量可想而知有幾多。
用上咁多湯料煲的湯，味鮮是一定的了，湯料嘅味道亦非同小可；鮑魚入味爽口，冬菇厚身肥美，火瞳淋身而不太鹹，阿P同身旁的Benson 仔瘋狂咁清咗半碟...在外面，食迷你佛跳牆就食得多，但原盅咁多料咁大的小妺還是第一次試。
飲完個令人瘋狂嘅湯之後，跟住到蝦籽柚皮鵝掌，可能之前個湯太出色，令味蕾一下子被寵壞了，令呢道菜有個對比、有一個落差。只可說味道普通，柚皮無澀味，整體一般。
到桂花蜜餞金蠔，金蠔配桂花蜜我還是第一次試，味道出奇地討好，只可惜蠔本身唔夠肥美，呢一道菜盡顯師傅調味功架。
阿P最喜歡吃的蝦終於出場；這道陳皮蝦的鮮蝦夠彈牙，煮得亦夠乾身香口，但我就不太吃到陳皮味，大食阿 P就鯨吞左三大隻。
跟住到飽肚系列出場：紅酒燴牛尾及八寶鴨。牛尾炆得夠淋入味，帶有微微酒香，紅蘿蔔及蕃茄已盡吸牛尾汁的精華，配上的蒜蓉包亦不會過燶。
至於八寶鴨，皮肉已煮得軟綿綿，輕輕一碰已輕易切開，餡料夠入味，蓮子不會過淋，醬汁濃而不鹹，整體亦不會太油膩。
有識食的爐兄寫菜單，咁就當然夠晒豐富同飽啦，最後仲有薑蔥蝦子撈麵同埋荷葉飯。呢個時候，我已經飽到投降，而家P就繼續食得起勁，事關荷葉飯同埋粗麵佢都係好鍾意食嘅。粗麵嘅薑蔥同蝦籽都好香，可惜嘅係粗麵嘅鹼水味略嫌過重。荷葉飯阿P話夠晒軟熟，材料足亦夠味。
最後的甜品生磨腰果露加湯圓香濃幼滑，既滋陰又補腎。
要特別喺度再次多謝鄭Auntie幫手book枱同埋爐兄安排嘅菜單，呢一局大大話話都等咗差唔多五個多月。回家途中，我見阿P若有所思，問佢所謂何事?他語帶葡萄的說，如自己母校舊生會都有會所餐館就好了。
我們一行39人，食完飯之後沖左入人哋個操場影相留念，那些年的感覺返返晒黎。期待下一次的會所飯局。
