1️⃣ 前菜：雙重口感，極致開胃 🥟
一開場就已經好有驚喜！「鴛鴦蓮藕餅」($168)唔簡單。平時出面食蓮藕餅一係煎一係炸，呢度叫得做「鴛鴦」，原來係大廚特意用 「一煎、一炸」兩種手法呈現！炸嗰件酥脆香口，煎嗰件就保留咗蓮藕嘅清甜同肉汁，一次過滿足兩個願望，口感層次豐富到不得了！💯
另外必點嘅 「黑醋脆鱔球」($208)，外皮炸到好似玻璃咁脆，黑醋汁酸甜度拿捏得完美，一咬落去鱔肉仲係鮮嫩多汁，完全無泥味，非常醒胃！
仲有佢哋呢個「18斬話梅醉乳鴿」($138)，酒香入味，話梅的酸甜味吊起了乳鴿的鮮味，斬件大小適中，送酒一流。 🍷
2️⃣ 湯品：滋補養生，火候十足 🥣
廣東菜最講究湯水，呢度嘅燉湯真係無得輸。
「杏汁豬肺燉花膠湯」($188)：絕對係心機之作！杏汁磨得好滑，豬肺處理得極乾淨，入口綿滑，花膠燉到起膠，飲完個嘴唇黐立立，感覺充滿骨膠原！
「黑蒜螺頭湯」($168)*同 「姬松茸杞子燉花膠湯」($188) 都係足料到爆，湯色清澈但味道濃郁，飲得出係用靚料燉足鐘數，暖胃又窩心。🥰
3️⃣ 主菜：視覺與味覺嘅盛宴 🔥
主菜環節真係高潮迭起，特別係服務同擺盤都好有「儀式感」！
「咖喱原條牛肋骨」($368)：呢道菜上枱嗰陣真係霸氣十足！原條牛肋骨燉煮得極之入味，最正係有專人喺席前用剪刀幫你剪開，睇住啲肉汁咇出嚟，真係流晒口水🤤。個靈魂在於個 「秘製咖喱汁」，香料味層次複雜，唔係死辣嗰種，配埋軟腍嘅牛肋肉，送飯真係無敵！
「辣不辣韭菜生煸方利」($598)：師傅將方利起肉，魚骨炸到好似風帆咁豎起，造型滿分！方利肉質本身就細嫩，用避風塘式做法加上大量韭菜爆炒，惹味得嚟又唔會蓋過魚嘅鮮味，外脆內軟，鑊氣十足！🐟
「西班牙栗子豬焦香叉燒」：用上西班牙栗子豬，油脂分佈均勻，燒到邊位帶少少焦香，入口鬆化，蜜汁香甜，係高水準嘅叉燒！
「黃金芝士炸釀鮮拆蟹蓋」($576/2位)：啖啖肉之選！鮮拆蟹肉份量超多，加上芝士焗製，鹹香同鮮甜完美融合，每一啖都係幸福感！🦀🧀
4️⃣ 甜品：精緻如畫，完美作結 🍬
最後嘅甜品環節都無令人失望，賣相精緻到唔捨得食！
「黑芝麻湯圓」($136/2位)：呢個湯圓擺盤好似藝術品咁！唔係浸喺糖水入面，而係類似「擂沙」嘅做法，外層裹滿香濃嘅黑芝麻，咬開係流沙餡，皮薄餡靚，煙韌控必試！⚫
「燕麥紫心番薯」($68)：一粒粒方塊造型好得意，外層沾滿燕麥，入面係軟糯嘅紫心番薯，甜度啱啱好，健康得嚟又有口感。🍠
