純一

香港人好鍾意食拉麵，喺每個香港人心目中，都會有一間鍾情嘅拉麵舖。而今次食到呢一間，入選咗我最喜愛拉麵之一。原因係老闆將每一碗麵都用心製作，創新嘅思維、以及每日親自挑選當季食材，另每一碗拉麵都與眾不同。 佢地既湯底食物每日早上四點鐘開始製作及淆製，拉麵絕無味精，食到食材新鮮感，加倍健康！

呢間餐廳係大角咀塘尾道，出地鐵行數分鐘就到。 餐廳裝修平實，好有家庭feel。 餐牌除咗有拉麵外，仲有唔少小食，價錢相宜😄
每碗拉麵都係即叫即整，製作需時， 食落好有驚喜！
1） 味噌拉麵 - 味噌湯底鮮甜，唔會死鹹味，飲曬都唔覺口渴。 拉麵呈曲形，口感爽彈煙韌。 豬肉有別於其他拉麵店，食得出新鮮豬肉。再配上原隻溏心蛋，好有心思嘅一道拉麵！

2） 辣豬肉拉麵 - 叫左中辣。 湯底原來係老闆用12款唔同辣椒來淆製而成，絕不落辣椒粉，所以食起嚟好順口，唔會感到好刺激，食到原本辣椒嘅香辣味！豬肉燒過，有焦香感。每條拉麵都吸收咗辣湯精華，非常惹味！

3）味付鯖魚 - 燒得好香，啖啖魚肉，口感紮實。老闆自家製調配醬汁，好特別！

4）燒汁冬菇 - 冬菇軟淋，新鮮嫩滑，讚！