棠記海鮮小廚

营业中

休息中

今日應好友邀約，入嚟屯門一聚，順便吃頓晚飯。由友人帶路，嚟咗三聖村豐漁樓地下呢間「棠記海鮮小廚」。店舖提供自來海鮮加工服務，明碼實價，每款每斤 $75。友人識飲識食，點菜嘅任務，就一於交由他作主，我只需坐定定等食就可以了。先嚟每人一隻脆炸鮑魚，鮑魚大大隻，面層炸到脆卜卜，既厚肉又結實，食落好香口，肉質鮮甜不韌，配上彈牙嘅口感，矜貴食材，絕不欺場。接著送上嘅豉椒炒蜆亦好有驚喜，蜆肉飽滿，鮮甜又冇沙，醬汁嘅分量亦啱啱好，不多不少，剛剛掛在蜆上，加上炒得鑊氣十足，夠晒惹味。炸乳鴿，乳鴿大小適中，入口皮脆肉嫩，唔會炸到過火，滑嫩得嚟又有肉汁，以淮鹽提味，味道啱啱好。蒜蓉西蘭花，西蘭花翠綠入味，炒得脆嫩爽口，調味亦恰好，保留了蒜蓉嘅香味，用嚟佐飯一流！另外仲叫咗兩個白飯，白飯以瓦砵盛上，米飯粒粒分明，甚有嚼勁。呢餐食得好滿意，飽肚又滿足，聽講店舖嘅菠蘿咕嚕肉都好出名，下次有機會會再嚟試下。